25-ամյա վարորդը ՎԱԶ 2199-ով բախվել է գազատարի հենասյանը եւ գլորվելով՝ գլխիվայր հայտնվել դաշտում (Լուսանկարներ)

Այսօր` մայիսի 2-ին, խոշոր ավտովթար է տեղի ունեցել Շիրակի մարզում։

Shamshyan.com-ի հաղորդմամբ ժամը 07։40-ի սահմաններում Արթիկ քաղաքի բնակիչ՝ 25-ամյա Արսեն Օվանեսովը իր վարած ՎԱԶ 2199 մակնիշի 35 ՏC 832 համարանիշի ավտոմեքենայով Արթիկ քաղաքի Շահումյան 1 հասցեի դիմաց դեռևս անհայտ հանգամանքներում դուրս է եկել ճանապարհի երթևեկելի գոտուց, բախվել գազատար խողովակի սյանը և մի քանի պտույտ գլորվելով՝ գլխիվայր հայտնվել դաշտում։

Ինչպես հայտնում է ֆոտոլրագրող Գագիկ Շամշյանը, վթարի հետևանքով վարորդ Ա. Ավանեսովը մարմնական վնասվածքներով տեղափոխվել է «Գյումրի» բժշկական կենտրոն։

Օպերատիվորեն դեպքի վայր են ժամանել Արտակարգ իրավիճակների նախարարության Փրկարար ծառայության Շիրակի մարզային փրկարարական վարչության հրշեջ-փրկարարական ջոկատը։ Ժամանել են նաև Ճանապարհային ոստիկանության 2-րդ սպայական գումարտակի 2-րդ վաշտի 2-րդ դասակի ծառայողները՝ վաշտի հրամանատար Վաչե Մալաքյանի, դասակի հրամանատար Լյուդվիգ Ղանդիլյանի գլխավորությամբ։

Տեղում հետաքննչական աշխատանքները ղեկավարել է նույն վաշտի ավագ հետաքննիչ Նաիրի Գասպարյանը, ում կողմից փաստի առթիվ նյութեր են նախապատրաստվում։