Չմոռանաք ձեզ հետ տանել 100 հազար դրամ աջակցությունը էժան պոպուլիզմ համարող Ալեն Սիմոնյանին. Անի Սամսոնյան

Երեկ ՀՀ ոստիկանություն բերման էին ենթարկել քաղաքացի Միքայել Մարգարյանին, որը կառավարության շենքի մոտ եկել էր եւ բողոքում էր, որ իրեն ստիպում են վճարել կոմունալները: Այս մասին ԱԺ-ում իր ելույթում նեց ԼՀԿ պատգամավոր Անի Սամսոնյանը:

«Քաղաքացի Միքայել Մարգարյանը այն վառ ապացույցն է, որ կառավարության հասցեական քաղաքականությունը տխուր եւ ողբալի վիճակում է: Տեսեք, ինչ է ստացվում: Միքայել Մարգարյանն ու իր ընտանիքը զբաղվում է մշակութային միջոցառումներով, ունեն կազմակերպություն: Մշակութային միջոցառումներ կազմակերպելու համար անհրաժեշտ է, որ հավաքվի 20 եւ ավելի մարդ, ինչը հիմա չի թույլատրվում: Միքայել Մարգարյանի աշխատանքը ենթադրում է, որ պետք է բաց լինեն ռեստորանները, սրճարանները, համերգասրահները, բայց այդ վայրերը փակ են:

Հիմա արտակարգ դրությունն ազդե՞լ է Միքայել Մարգարյանի սոցիալական վիճակի վրա, թե ոչ: Կառավարությունը որոշել է, որ չի ազդել եւ նրան չի ներառել, ասենք, 8-րդ միջոցառման շահառուների ցանկում, եւ մարդը չի կարողանում վճարել իր կոմունալները»,-ասաց Սամսոնյանը:

Նա հավելեց, որ կամ կառավարությունում լավ չեն պատկերացնում տնտեսական գործունեությունների շղթան, կամ լավ չեն աշխատում. «Երկու դեպքում էլ վիճակը շատ վատ է: Այո, այսպիսին է իրավիճակը ինչպես բոլոր պատերազմների ժամանակ եւ մարդիկ զրկվել են իրենց աշխատանքից: Ես եւ դուք չենք զրկվել, դրա համար ձեր ձայնը տաք տեղից է գալիս»,-ասաց Սամսոնյանը՝ դիմելով «Իմ քայլը» խմբակցության պատգամավոր Հովհաննես Իգիթյանին:

Նա անդրադարձավ նաեւ «Իմ քայլի» պատգամավոր Բաբկեն Թունյանին. «Պարոն Թունյան, ասում եք, որ ոչ ոք չի սովելու ՀՀ-ում: Շատ լավ նպատակ է, բայց ես առաջարկում եմ, որ դուք հրապարակեք ձեր հեռախոսահամարը եւ ես համոզված եմ՝ կես օրվա ընթացքում այնքան քաղաքացի ձեզ կզանգահարի, որն ունի սնունդի կարիք, որ դուք կզղջաք ձեր ելույթի համար»:

Ասում եք, Մանե Թանդիլյանը նախարար էր, չգիտե՞ր, որ տվյալներն ամբողջական չեն, որ խնդիր ունենք: Այո, գիտեր, բայց ի տարբերություն ձեզ, Մանե Թանդիլյանը որպես նախարար փորձադաշտ չէր դարձնի քաղաքացիներին այն համակարգի համար, որը դուք ստեղծել եք եւ ստիպում եք, որ մարդիկ ամեն օր մտնեն, լրացնեն ու իրենց չգտնեն: Սա՞ է ձեր հասցեականությունը»:

Անի Սամսոնյանը ընդգծեց, որ ավելի լավ է մի քանի հազար ընտանիք ավել ստանա այդ 100 հազար դրամը, բայց հարյուրավոր ու հազարավոր ընտանիքներ արդարաբար ստանան այդ փողը. «Նույնը վերաբերում է թոշակառուներին: Թող ձեր ծնողները եւս ստանան թոշակ, բայց նրանց հետ միասին ստանան շատ այլ թոշակառուներ, որոնք զանգում են ու ունեն այդ թոշակի կարիքը»:

Իր խոսքի վերջում, Սամսոնյանը կրկին անդրադարձավ Միքայել Մարգարյանին. «Հաջորդ անգամ երբ որեւէ քաղաքացու, օրինակ Միքայել Մարգարյանին բերման կենթարկեն ոստիկանություն, հարգելի իշխանության պատգամավորներ, գնացեք նրա հետեւից եւ բացատրեք նրան ձեր հասցեականության քաղաքականությունը: Չմոռանաք ձեզ հետ տանել 100 հազար դրամ աջակցությունը էժան պոպուլիզմ համարող փոխխոսնակ Ալեն Սիմոնյանին, որպեսզի նա էլ բացատրի: Չնայած, կարող եք չտանել, որովհետեւ նրան նույնիսկ սեփական թիմում լուրջ չեն ընդունում, ուր մնաց մենք ու ժողովուրդը լուրջ ընդունենք»: