Ամերիկան հատուկ պատասխանատվություն է կրում Հայոց ցեղասպանության հիշատակը պահպանելու համար. Կոնգրեսական Սթենի Հոյեր

Ամերիկան հատուկ պատասխանատվություն է կրում Հայոց ցեղասպանության հիշատակը վառ պահպանելու համար, որպեսզի ապագա սերունդը չմոռանա տեղի ունեցածը: Այդ մասին ասվում է ԱՄՆ Ներկայացուցիչների պալատում դեմոկրատական մեծամասնության առաջնորդ, կոնգրեսական Սթենի Հոյերի հայտարարության մեջ:

«Ես միանում եմ Հայոց ցեղասպանության 105-րդ տարելիցի հիշատակմանը, որի հետեւանքով չորս տարվա ընթացքում զոհվել է ավելի քան 1.5 միլիոն մարդ:

20-րդ դարի առաջին այդ ցեղասպանությունը սկսվել է գրողների, հոգեւորականների, ուսուցիչների, քաղաքական գործիչների, բժիշկների եւ մտավորականության հետապնդմամբ, այնուհետեւ վերածվել զանգվածային սպանությունների եւ մահվան երթերի:

Հայազգի ամերիկացիների համար այս օրը ցավալի հիշողության, սգո եւ մտորումների օր է, Ցեղասպանությունը վերապրածների սերունդների համար ժամանակ է հիշելու ընտանիքի կորցրած անդամների եւ քայքայված համայնքների մասին: Ես հպարտ եմ, որ հոկտեմբերին Ներկայացուցիչների պալատում ներկայացրել են Հայոց ցեղասպանությունը ճանաչող բանաձեւ, որը հաստատվել էր հզոր երկկուսակցական աջակցության շնորհիվ: Սենատը նաեւ ձեռնարկել էր միջոցներ, եւ պատմության մեջ առաջին անգամ Կոնգրեսի երկու պալատներն ընդունել էին Հայոց ցեղասպանությունը ճանաչելու մասին բանաձեւը:

Ամերիկան հատուկ պատասխանատվություն է կրում ցեղասպանության մասին հիշողությունը պահպանելու համար, որպեսզի ապագա սերունդը չմոռանա տեղի ունեցածը, եւ որ այդ ժամանաշրջանի սարսափելի դեպքերն այլեւս երբեք տեղի չունենան, այնպես, ինչպես մենք հիշում ենք նացիստների չարագործությունները, որոնք դասեր էին քաղել Հայոց ցեղասպանությունից՝ իրագործելով իրենց սեփականը:

Դեմոկրատների գլխավորած Ներկայացուցիչների պալատը կշարունակի հանդես գալ ռասիզմի, անհանդուրժողականության եւ անարդարության դեմ անկախ վայրից, եւ մենք կշարունակենք պայքարել հանուն քաղաքականության, որը կպահպանի մեր երկիրը որպես հույսի փարոս ազատություն, անվտանգություն եւ ավելի լավ կյանք փնտրող մարդկանց համար»: