Ես էլ չգիտեմ, թե ՀԾՀ-ն ինչ է, մի հատ ասեք՝ դա ի՞նչ է. Նիկոլ Փաշինյան

Ես երեկ ժամանակ հատկացրի և կարդացի իմ ֆեյսբուքյան էջին քաղաքացիների նամակները, և կարող եմ ասել, որ այս պահի դրությամբ ունենք մի քանի խնդիր: Այս մասին, այսօր՝ ապրիլի 16-ին, կառավարության նիստում նշեց ՀՀ վարչապետ Նիկոլ Փաշինյանը:

«Նախ, շատ մարդիկ տեղեկացված չեն, որ իրենք հանդիսանում են այս կամ այն միջոցառման շահառու: Սա պետք է ազդակ լինի, որ մենք բավարար չափով չենք լուսաբանում, թե որ միջոցառումը կոնկրետ որ խմբին է վերաբերում և ինչ պետք է անի քաղաքացին այդ աջակցությունից օգտվելու համար»,-ասաց Փաշինյանը և կառավարության տեղեկատվական ՊՈԱԿ-ին հանձնարարեց շատ ակտիվորեն լուսաբանել բոլոր ծրագրերը:

«Լուսաբանումն այն է, որ յուրաքանչյուր քաղաքացի, բոլոր շահառուները դրանից տեղյակ են, և հստակ ասվում է, թե քաղաքացին որտեղ և ինչ պետք է անի ծրագրից օգտվելու համար»,-ասաց Վարչապետը:

Աշխատանքի և սոցիալական հարցերի նախարար Զարուհի Բաթոյանը նկատեց. «Մարդիկ երբեմն չգիտեն, թե ինչպես պետք է լրացնեն դիմումները, որպեսզի հայտ ներկայացնեն կառավարության ընդունած միջոցառումներին, թեև ուղեցույց է մշակվել ու հրապարակվել:

SMS-ի միջոցով գալիս է կոդը և իրենք պետք է լրացնեն: Այստեղ նաև տաբեր բազաների հետ համեմատելու խնդիր կա: Հիմա աշխատանք է տարվում նաև մերժված դիմումները վերլուծելու ուղղությամբ: Ինչպես արդեն նշեցի, դրանք ոչ ճիշտ լրացնելու հետևանք են: Մենք բոլոր տեղեկատվական հարթակներն օգտագործում ենք, հեռախոսակապով աջակցում ենք մարդկանց, իսկ այսօր նաև լրացուցիչ խումբ ենք ձևավորելու, որը կօգնի մարդկանց հասկանալ, թե ինչպես պետք է լրացնել: Կան օրինակ քաղաքացիներ, որոնք չգիտեն, թե ինչ է ՀԾՀ-ն, սոցիալական քարտը»:

Նիկոլ Փաշինյանի խոսքով, դա նշանակում է, որ լրատվական համակարգը լավ չի աշխատում. «Կներեք, բայց ես էլ չգիտեմ, թե ՀԾՀ-ն ինչ է: Մի հատ ասեք՝ ՀԾՀ-ն ինչ է: Եթե մենք միջոցառում ենք անում, որտեղ ՀԾՀ-ի իմանալը կարևոր է, պետք է մարդկանց ասել, թե դա ինչ է»:

Բաթոյանը հայտնեց, որ դա արվում է, ուղեցույցում նշված է. «Եթե շահառուն չգիտի, թե դա ինչ է, նշանակում է, որ չենք արել այնպես, որ իմանա: Մենք այսօր քաղաքացուն ասում ենք՝ ձեզ այս-այս պարագաներում օգնում ենք, բայց մենք այսօր խնդիր ունենք այդ օգնությունը արդյունավետ տեղ հասցնելու գործում»,-արձագանքեց վարչապետը՝ հավելելով, որ արդեն 5-6 անգամ քննարկել են այս հարցը ու հիմա ստիպված են քննարկել նաեւ կառավարության նիստում՝ հրապարակային: