на Русском
Ոչ ոք չպետք է լռի բռնության առջև, դա յուրաքան... 
Հպարտ եմ կրթվելու և լուսավորվելու մեր պապերի ... 
Թրամփը վստահ չէ, որ ԱՀԿ-ն ընդունակ է լայնածավալ փոփոխությունների, որոնք ԱՄՆ-ն նրանից սպասում է
Վաշինգտոնը Առողջապահության համաշխարհային կազմակերպությունից լայնածավալ փոփոխություններ է սպասում: Այս մասին Սպիտակ տանը ճեպազրույցում հայտնել է ԱՄՆ նախագահ Դոնալդ Թրամփը՝ միաժամանակ շեշտելով, թե վստահ չէ, որ կազմակերպությունն ունակ է այդպիսի փոփոխություններ իրականացնել, փոխանցում է ՏԱՍՍ-ը:
«Մենք ինչ-որ ժամանակ անց կկողմնորոշվենք [ԱՀԿ-ին ֆինանսավորելու հարցում], բայց նրանք պետք է իրականացնեն կա՛մ լայնածավալ փոփոխություններ, ես անգամ չգիտեմ՝ կկարողանան դա անել, կա՛մ փողը կտանք այլ մարդկանց: Մենք ցանկանում ենք մարդկանց օգնել»,- ասել է Թրամփը:
Նա կրկին կազմակերպությանը քննադատել է՝ անվանելով Չինաստանի [ձեռքին] «գործիք»: «Նա եղել է Չինաստանի գործիքը, նա եղել է, ինչպես արդեն ասել եմ, ամբողջությամբ կողմնորոշված դեպի Չինաստան: ԱՀԿ-ն, ինչպես եւ Առեւտրի համաշխարհային կազմակերպությունը, տասնամյակներ շարունակ ԱՄՆ-ին այնքան վատ են վերաբերվել: Եվ նրանք [գործել են] Չինաստանի օգտին»,- պնդել է ԱՄՆ նախագահը:
Թրամփը կրկին հայտարարել է, որ ԱՀԿ-ն դեմ էր կորոնավիրուսի տարածման հետ կապված իր մտցրած մուտքի արգելքին արտասահմանցիների համար, որոնք դրանից առաջ եղել էին Չինաստանում: «Նրանց շատ երկար ժամանակ էր պետք՝ գիտակցելու համար, թե ինչ է տեղի ունենում, բայց ես զգացողություն ունեմ, որ նրանք ստույգ գիտեին, թե ինչ է կատարվում: Ցավոք, մյուս երկրները վստահեցին ԱՀԿ-ին եւ չմտցրին որեւէ արգելք: Եվ տեսնում եք, թե ինչ պատահեց Իտալիայի հետ, ինչ պատահեց Իսպանիայի հետ, ինչ պատահեց Ֆրանսիայի հետ»,- հավելել է Սպիտակ տան ղեկավարը:
«Դա սարսափելի ողբերգական սխալ էր կամ, հնարավոր է, նրանք [ԱՀԿ-ն] գիտեին: Ես վստահ եմ, որ նրանք դրա ամբողջ լրջության մասին չգիտեին, բայց հնարավոր է, որ գիտեին, որովհետեւ եթե գիտեին, ապա դա է՛լ ավելի սարսափելի հանցագործություն է»,- հավելել է Թրամփը:
Թրամփը երեքշաբթի հայտարարել էր, որ իր աշխատակազմին հանձնարարել է դադարեցնել ԱՀԿ բյուջե վճարումները՝ «մինչեւ վատ կառավարման եւ կորոնավիրուսի տարածման մասին տվյալները թաքցնելու գործում կազմակերպության դերի գնահատման անցկացումը»: Նրա խոսքով՝ կազմակերպության սխալ գնահատականների եւ հանձնարարականների պատճառով աշխարհում կորոնավիրուսով վարակվել է 20 անգամ ավելի շատ մարդ, քան հնարավոր էր:
