Լավրովն առաջարկել է ուսումնասիրել կորոնավիրուսի վերաբերյալ գաղտնի վարկածները

Ռուսաստանի ԱԳ նախարար Սերգեյ Լավրովը կարծում է, որ կորոնավիրուսի ի հայտ գալու բոլոր վարկածները պետք է ուսումնասիրել սթափ գլխով՝ դասեր քաղելու եւ հնարավոր նոր համավարակներին պատրաստվելու համար:

Լավրովը «Կոմերսանտ» պարբերականի հետ հարցազրույցում նշել է, որ անգլիացիներն ու ամերիկացիները Չինաստանին մեղադրում են, որ բոլորին ժամանակին չի իրազեկել, իսկ հանրապետականներն ու դեմոկրատները՝ Դոնալդ Թրամփին այն բանի համար, որ նա նշանակություն չտվեց պոտենցիալ սպառնալիքին: «Հակառակ ուղղությամբ մեկնաբանություններ են հայտնվում հակառակի ապացույցներով»,- ասել է նա: ՌԴ ԱԳ նախարարին հարց էր տրվել՝ կապված «ներկայիս համավարակի առաջացման պատճառներին առնչվող գաղտնի վարկածների» հետ

ՌԴ արտաքին քաղաքականության գերատեսչության ղեկավարը թվարկել է կորոնավիրուսի առաջացման մի քանի վարկածներ: Դրանցից մեկի համաձայն՝ Ուհանում (որտեղ անցյալ տարվա վերջին գրանցվել էին վարակման առաջին դեպքերը) լաբորատորիա է եղել, որտեղ Պենտագոնը ֆինանսավորել է չղջիկների վրա կատարվող փորձարկումների ծրագիրը:

«Սա ոչ միայն հետաքրքիր է: Այստեղ կարեւոր է հասկանալ, թե իրականում ինչպես է եղել»,- ասել է Լավրովը:

Նրա ներկայացրած մյուս վարկածի համաձայն՝ Ուհան է գնացել ամերիկյան պատվիրակություն զինվորական սպորտային խաղերի եւ ապրել է հյուրանոցում, որը մոտ էր տեղակայված շուկային, որտեղ հայտնաբերվել են վարակման դեպքերը: «Սրանով պետք է զբաղվել, բայց առանց էմոցիաների, համադրելով փաստերը, այլ ոչ թե տեղեկատվության այդ ամբողջ հոսքում փնտրելով միայն այն, ինչը կարող է վարկաբեկել քո մրցակցին»,- նշել է ՌԴ ԱԳ նախարարը:

Լավրովը նաեւ մեկնաբանել է Լուկաշենկոյի առաջարկը, որը կորոնավիրուսի դեպքում խորհուրդ էր տվել «բաղնիք, տրակտոր, օղի կամ ընդհանրապես դրան ուշադրություն չդարձնել»: «Ես չէի քամահրի Բելառուսի նախագահ Ալեքսանդր Լուկաշենկոյի որոշ խորհուրդներ»,- ասել է նախարարը: Ընդ որում՝ հստակեցրել է, որ աշխատավայրում զրուցակիցների հետ շփվում է միմյանցից 2 մետր հեռավորությամբ եւ ձռքերը սովորականից ավելի հաճախ է լվանում:

Չինացի մասնագետներն ու Առողջապահության համաշխարհային կազմակերպության փորձագետները մինչեւ հիմա չեն պարզել, թե ով է եղել «զրոյական պացիենտը», եւ որն է եղել կորոնավիրուսի սկզբնական աղբյուրը (սակայն չինական լրատվամիջոցները հայտնել են, որ այդ մարդը կարող էր լինել ծովամթերքի շուկայի վաճառողուհին):

ԱՀԿ ներկայացուցիչ Մարգարեթ Հարիսը ապրիլի սկզբին հայտարարել էր, որ հիմա հիմնական վարկածներից մեկն է այն, որ վիրուսն անցել է չղջիկից, սակայն նրա եւ մարդու միջեւ կարող էր միջնորդ լինել: Նրա խոսքով՝ չղջիկներն իրենք կորոնավիրուսով չեն հիվանդանում, բայց միաժամանակ դրա կրողներն են: Ինչպես նշել է Հարիսը, վարկած կար, որ միջանկյալ փուլ են եղել մողեսները, որոնք Չինաստանում գործածում են սնունդի մեջ: «Բայց հիմա մենք դրանում համոզված չենք»,- խոստովանել է նա:

«Վտանգավոր վիրուս» ֆիլմում միջանկյալ փուլի օրինակ է բերել նաեւ Սանկտ Պետերբուրգի Պաստերի անվան համաճարակաբանության եւ մանրէաբանության ԳՀԻ ինովացիոն աշխատանքների գծով փոխտնօրեն Ալեքսանդր Սեմյոնովը: «Կատուն զբոսնում է ձեղնահարկում, որտեղ ապրում են չղջիկներ: Կատուն տրորում է ինչ-որ կենսաբանական հեղուկ եւ վարակվում, կատուն սերտորեն շփվում է մարդու հետո, մարդը վարակվում է»,- պարզաբանել է նա: