«Օնիքսում»–ին առնչվող ֆինանսական բուրգի գործով մեկ անձի մեղադրանք է առաջադրվել. նոր մանրամասներ

«Օնիքսում ԱՐ ԷՅ» ՍՊԸ-ի կողմից ֆինանսական բուրգի ենթադրյալ մասնակից լինելու վերաբերյալ քրեական գործով մեղադրանք է առաջադրվել մեկ անձի, ում նկատմամբ, որպես խափանման միջոց է ընտրվել չհեռանալու մասին ստորագրությունը։ Այս մասին NEWS.am–ի գրավոր հարցմանն ի պատասխան հայտնել են Քննչական կոմիտեի Երևանի քննչական վարչության ծանր հանցագործությունների քննության բաժնից։

ՔԿ–ից միաժամանակ տեղեկացրին, որ քրեական գործով ներկա պահին տուժողի դատավարական կարգավիճակ ունի 7 անձ։

Հայտնի դարձավ նաև, որ «Օնիքսում ԱՐ ԷՅ» ՍՊԸ-ին առնչվող ՔՕ 189.1–րդ հոդվածի 3–րդ մասի 1–ին և 3–րդ կետերի հատկանիշներով հարուցված քրեական գործը ԱԱԾ–ից ՔԿ ուղարկվելուց հետո միացվել է ընկերության վերաբերյալ 2018 թվականի նոյեմբերին՝ ՀՀ քրեական օրենսգրքի 189.1-րդ հոդվածի 1-ին մասի հատկանիշներով հարուցված հարուցված քրեական գործին և քննվում է նույն վարույթում։

Քննչական կոմիտեից հետաքրքրվել էինք, արդյոք վարույթն իրականացնող մարմինը դիմե՞լ է լիազոր մարմնին մինչև քննության ավարտը հիշյալ ՍՊԸ–ի գործունեությունը դադարեցնելու պահանջով, թե ոչ։ Ի պատասխան՝ ՔԿ–ից հայտնեցին, որ քննության շահերից ելնելով այլ տվյալներ ենթակա չեն տրամադրման։

«Կատարվում են անհրաժեշտ քննչական և դատավարական գործողություններ ենթադրյալ հանցավոր սխեմայի մեջ ներգրավված անձնաց ամբոջական շրջանակը պարզելու և վերջիններիս արարքներին իրավական գնահատական տալու ուղղությամբ»,–ասված է մեզ ուղարկված պատասխանում։

Նշենք, որ չնայած հարուցված քրեական գործին, «Օնիքսում ԱՐ ԷՅ» ՍՊԸ–ն շարունակում է գործունեություն ծավալել Հայաստանում, ավելին, նոր տիպի Կորոնավիրուսի համավարակի տարածմամբ պայմանավորված ընկերությունն անցել է առցանց աշխատանքի և իրենց «բիզնես-ծրագրում» ներգրաված անձանց հորդորում է «բիզնեսը զարգացնել տնից` առցանց աշխատելով»:

NEWS.am–ը փորձեց կապ հաստատել «Օնիքսում ԱՐ ԷՅ» ՍՊԸ–ի ներկայացուցիչների հետ, սակայն մեր հեռախոսազանգին պատասխանած քաղաքացին հայտնեց, որ ինքն այլևս չի աշխատում տվյալ ընկերությունում, իսկ ընկերության ֆեյսբուքյան էջը համակարգողը խուսափեց հեռախոսահամար տրամադրել և մեր հարցերին պատասխանել։

Հիշեցնենք՝ 2020թ. փետրվարի 11–ին Ազգային անվտանգության ծառայությունը հայտարարեց ֆինանսական բուրգի մասնաճյուղ ստեղծելու, ղեկավարելու և դրանում առանձնապես խոշոր չափերով գումարներ ներգրավելու դեպքի բացահայտման մասին։ Ըստ ԱԱԾ հաղորդագրության՝ մի խումբ քաղաքացիներ 2018 թ. նոյեմբերից արտերկրում գրանցված, տուրիստական ծառայություններ մատուցող կազմակերպության անունից բազմաթիվ քաղաքացիների համոզել են ներգրավել կազմակերպության «բիզնես-ծրագրին» և փաստացի նախնական համաձայնությամբ ստեղծել ու ղեկավարել են ֆինանսական բուրգի մասնաճյուղ՝ դրա մեջ ներգրավելով առանձնապես խոշոր չափերի գումար, ընդ որում անդամակցած անձանց նյութական օգուտը պայմանավորվել է բացառապես նոր ներդրողների ներգրավումից ստացված գումարների հաշվին։