Թրամփը հայտարարել է ԱՀԿ-ի բյուջե վճարումների դադարեցման մասին

ԱՄՆ նախագահ Դոնալդ Թրամփը Սպիտակ տանը կայացած մամուլի ասուլիսին հայտարարել է, որ Վաշինգտոնը դադարեցնում է վճարումները Առողջապահության համաշխարհային կազմակերպության (ԱՀԿ) բյուջե, հայտնում է ՌԲԿ-ն` վկայակոչելով Reuters-ը: Պետության ղեկավարը նշել է, որ այդ որոշումը կայացվել է այն ֆոնին, որ ԱՀԿ-ն «չի կարողացել կատարել իր առաջնային պարտավորությունը եւ պետք է պատասխանատվությու կրի»:

Թրամփի խոսքով` կազմակերպության գործողությունները նպաստել են Չինաստանի «ապատեղեկատվությանը» COVID-19 կորոնավիրուսի վերաբերյալ, ինչը, ամենայն հավանականությամբ, ավելի մեծ բռնկման է հանգեցրել, քան կարող էր լինել հակառակ դեպքում:

Ինչպես նշել է Թրամփը, ամերիկացի հարկատուները տարեկան 400 միլիոնից մինչու 500 միլիոն դոլար են վճարել ԱՀԿ բյուջե, մինչդեռ Չինաստանը վճարել է 40 միլիոն դոլար: «Միացյալ Նահանգները` որպես կազմակերպության հիմնական հովանավոր, պետք է պնդեն, որպեսզի ԱՀԿ-ն ստանձնի ամբողջ պատասխանատվությունը»,- ընդգծել է նա:
ԱՄՆ նախագահը նաեւ հայտարարել է, որ Միացյալ Նահանգները մտադիր է հասնել Առողջապահության համաշխարհային կազմակերպության բարեփոխմանը, եւ այդ հարցը կքննարկվի այլ երկրների հետ: «Մենք կշարունակենք փոխգործակցել ԱՀԿ-ի հետ` հասկանալու համար, արդյոք այն կարող է էական բարեփոխումներ իրականացնել: <...> Եվ մենք կքննարկենք առողջապահական ոլորտում այլ երկրների եւ գործընկերների հետ, թե ինչ պետք է անենք ԱՀԿ մուծվող այս ամբողջ գումարի հետ»,- եզրափակել է ամերիկացի առաջնորդը:

Ապրիլի 7-ին Թրամփը հայտարարել էր, որ ԱՀԿ-ն քիչ բան է արել իր երկրում կորոնավիրուսի համաճարակը կանխելու համար եւ չափազանց շատ ժամանակ է տրամադրել Չինաստանում ստեղծված իրավիճակի վրա: «ԱՀԿ-ն իսկապես ձախողել է ամեն ինչ: Չգիտես ինչու, կազմակերպությունը, որին հիմնականում պահում են Միացյալ Նահանգները, իր ողջ ուշադրությունը կենտրոնացել է Չինաստանի վրա»,- ասել էր նա:

Ավելի ուշ Թրամփը հայտնել էր, որ Վաշինգտոնը քննարկում է ԱՀԿ-ի բյուջե արվող վճարումների դադարեցումը: Հաջորդ օրը Թրամփը եւ ԱՄՆ պետքարտուղար Մայք Պոմպեոն Սպիտակ տանը կայացած ճեպազրույցին հանդես էին եկել կորոնավիրուսի թեմայի վերաբերյալ` մատնանշելով Առողջապահության համաշխարհային կազմակերպության կողմից թույլ տրված մի շարք սխալները: Պետության ղեկավարը նշել էր, որ 2019 թվականին ԱՀԿ-ն ԱՄՆ-ից 452 միլիոն ԱՄՆ դոլարի չափով ֆինանսավորում է ստացել, բայց սխալվել է «շատ հարցերի հետ կապված»: Իր հերթին, Պոմպեոն համաձայնել էր Թրամփի դիրքորոշման հետ` հայտարարելով, որ կազմակերպությունը չի արդարացրել սպասումները: Նա նաեւ չէր բացառել ԱՀԿ ֆինանսավորման կրճատումը եւ ապագայում դրա ղեկավարության փոփոխությունը: