14 Ապրիլ, 2020 10:31

Հասարակությունը մնացել է վարչապետի ու ԱՆ մատուցած լրահոսի հույսին. Մեկն ասում է՝ շուտով բնականոն կյանքին կանցնենք, մյուսը՝ վիրուսը վերահսկողությունից դուրս է եկել. «Իրատես»

14 Ապրիլ, 2020 10:31 Մամուլ

«Իրատես» թերթը գրում է.

«Կորոնավիրուսը, ի թիվս առողջապահական և տնտեսական բազում խնդիրների, այլ ոլորտների բացթողումները ևս ի ցույց դրեց։ Այս օրերին ամենապահանջվածը պիտի լիներ ու ամենաշատը պետք է հնչեր վարակաբանների, հոգեբանների խոսքը, որոնք կառավարության համապատասխան օղակների հետ կաշխատեին և տեղեկությունն առանց խուճապի ու հնարավորինս մասնագիտորեն կներկայացնեին հասարակությանը։ Այս կարևոր օղակի աշխատանքը բացակայում է։

Մինչդեռ ի՞նչ ունենք այսօր. բժիշկներն ու հոգեբանները լռում են, խոսում են միայն պաշտոնյաները, որոնց հայտարարությունները, մեղմ ասած, հակասում են իրար։ Երբ վիրուսի վերաբերյալ առողջապահության նախարարն է շտապում տեղեկություն տրամադրել, հասկանալի է, բայց երբ վարչապետն է բոլորից առաջ ընկնում ու ամեն հարցում ցանկանում առաջին «սուրհանդակը» լինել, արդեն ծիծաղելի էլ չէ։

Երբ ևս մեկ ամսով էլ է արտակարգ դրությունը երկարաձգվում, անհանգստացնող է մարդկանց ոչ միայն տնտեսական, այլև հոգեբանական վիճակը։ Ի վերջո, բոլորը չէ, որ նույն կերպ են արձագանքում վիրուսի վերաբերյալ տեղեկություններին։ Մի մասի վրա վարակակիրների օր օրի ավելացող թիվը հոգեբանական մեծ ճնշում է առաջացնում, երբ դրան էլ գումարվում է առողջապահության նախարարի այն հայտարարությունը, թե վիրուսի տարածումը վերահսկողությունից դուրս է եկել, պատկերացնու՞մ եք, թե ինչ է լինելու մեկուսացած, հոգեբանորեն վատ վիճակի մեջ հայտնված մարդկանց հետ։ Մինչդեռ մեկ ամիս էլ պիտի դիմանալ, իսկ վարակվածների թիվն ավելի է մեծանալու։

Այս իրավիճակում պետք է հոգեբանները խոսեն ու մարդկանց բացատրեն իրավիճակը, խորհուրդներ տան, վարակաբանները ներկայացնեն հիվանդության մասին ստույգ ու արդեն հայտնի փաստեր, վտանգների մասին նախազգուշացնեն, փարատեն հանրության շրջանում պտտվող միֆերը։ Բայց հասարակությունն այսօր մնացել է վարչապետի ու առողջապահության նախարարի մատուցած լրահոսի հույսին, որոնցից մեկն ասում է, թե շուտով բնականոն կյանքին կանցնենք, իսկ մյուսն էլ, թե վիրուսը վերահսկողությունից դուրս է եկել, 1-2 տարի հնարավոր չի լինելու վերադարձ նախկին կյանքին։

Վիրուսի վերաբերյալ մասնագիտորեն ոչ կոմպետենտ վարչապետը, ինչպես ինքն է ասում, չափից շատ խուճապը կանխում, այն է՝ վտանգի զգացողությունը բթացնում է, իսկ առողջապահության նախարարն էլ իր հայտարարություններով սրտաճաք է անում նյարդերից թույլ մարդկանց։ Ի վերջո, այս իրավիճակում Նիկոլ Փաշինյանը պետք է վայր դնի վարակաբանի իր «դափնիներն» ու թողնի, որ մասնագետները հանրության հետ խոսեն, բացատրեն իրավիճակը»:

Առավել մանրամասն՝ թերթի այսօրվա համարում:

Այս թեմայով