Վթար Երեւանի Պռոշյան եւ Այգեձորի փողոցների խաչմերուկում. «Mercedes»-ը հայտնվել է «Toyota Camry»-ի վրա (Լուսանկար)

Հայաստանի ԱԻՆ-ում, ապրիլի 9-ին, ժամը 23:58-ին Ճգնաժամային կառավարման ազգային կենտրոն ահազանգ է ստացվել, որ Երեւանի Պռոշյան եւ Այգեձորի փողոցների խաչմերուկում տեղի է ունեցել ավտովթար:

Դեպքի վայր է մեկնել ԱԻՆ ՓԾ փրկարարական ուժերի վարչության հատուկ նշանակության փրկարարական աշխատանքների իրականացման կենտրոնի փրկարարական ջոկատը:

Պարզվել է, որ բախվել են «Mercedes» (վարորդ՝ Միսակ Դ.), «Toyota Camry» (վարորդ` Գերասիմ Հ.) եւ «Opel Vectra» (վարորդի տվյալները չի հաջողվել պարզել) մակնիշների ավտոմեքենաները, ինչի հետեւանքով «Mercedes» մակնիշի ավտոմեքենան մասամբ հայտնվել է «Toyota Camry» մակնիշի ավտոմեքենայի վրա:

«Toyota Camry» մակնիշի ավտոմեքենայի ուղեւոր Արման Խ.-ն (ծնված 1995 թ.) տարբեր աստիճանի մարմնական վնասվածքներով հոսպիտալացվել է «Հերացի» թիվ 1 հիվանդանոցային համալիր, որտեղ ստանալով համապատասխան բուժօգնություն՝ դուրս է գրվել:

Փրկարարները հոսանքազրկել են «Mercedes» եւ «Toyota Camry» մակնիշների ավտոմեքենաները: