Նախկին ամուսինը գնացել է կնոջ վերջը տալու եւ խոհանոցային դանակով հարվածներ հասցրել նրան. գործը դատարանում է

Նախկին ամուսինը խոհանոցային դանակով մի քանի հարվածներ է հասցրել կնոջ կենսական նշանակություն ունեցող օրգաններին, չի հասցրել գործն ավարտին հասցնել, քանի որ կինը կարողացել է դիմադրել: Այս մասին տեղեկանում ենք Դատական-տեղեկատվական համակարգից:

Ըստ մեղադրական եզրակացության`Գարեգին Մ.-ն 2020թ. հունվարի 2-ին ժամը 05-ի սահմաններում, ալկոհոլի ազդեցության տակ, նախկին կնոջը՝ Նարինե Մ.-ին սպանելու նախնական դիտավորությամբ, գնացել է վերջինիս բնակարան, որտեղ Նարինե Մ.-ին ասել է, որ եկել է նրա վերջը տալու ու հագին եղած բաճկոնի ծոցագրպանից հանել է դեղնականաչավուն գույնի խոհանոցային դանակն ու Նարինե Մ.-ին ապօրինաբար կյանքից զրկելու դիտավորությամբ դանակով բազմաթիվ հարվածներ է հասցրել նրա կյանքի համար կենսական կարեւոր նշանակություն ունեցող օրգաններին:

Գարեգին Մ.-ն հանցագործությունն իր կամքից անկախ հանգամանքներով ավարտին չի կարողացել հասցնել, քանի որ Նարինե Մ.-ն դիմադրություն ցույց տալու ընթացքում բռնել է նրա ձեռքին եղած դանակի շեղբը, որի հետեւանքով այն կոտրվել է, ինչից հետո Գարեգին Մ.-ն տեղում բռնվել է ոստիկանության աշխատակիցների կողմից տվյալ բնակարանում, իսկ «Էրեբունի» բկ-ի բժշկական միջամտության շնորհիվ հաջողվել է փրկել Նարինե Մ.-ի կյանքը:

Գարեգին Մ.-ին մեղադրանք է առաջադրվել ՔՕ-ի 34-րդ եւ 104-րդ հոդվածներով (Հանցափորձ, Սպանություն):

Գործը մարտի 16-ին մակագրվել է Երեւանի ընդհանուր իրավասության դատարանի դատավոր Արտակ Թադեւոսյանին: