Թուրքիայում կորոնավիրուսի տարածման պատճառով հետաձգվել են բոլոր միջոցառումները

Թուրքիայում կորոնավիրուսի տարածման պատճառով հետաձգվել են բոլոր գիտական, մշակութային միջոցառումները: Համապատասխան հրամանագիրը ստորագրել է երկրի նախագահ Ռեջեփ Էրդողանը:

Թուրքիայում կորոնավիրուսից մահացել է 4 մարդ: Այս մասին հայտնել է Թուրքիայի առողջապահության նախարար Ֆահրեթին Քոջան: Վարակման դեպքերի թիվը հասել է 359-ի:

Ընդհանուր առմամբ 9800 մարդ կարանտինի մեջ է գտնվում:

Ավելի վաղ Էրդողանը թուրքերին կոչ է արել մնալ տանը առնվազն 3 շաբաթ:

Անկարան դադարեցրել է դեպի 20 երկրներ չվերթները, փակ են բոլոր դպրոցները, սրճարաններն ու բարերը, արգելվել են զանգվածային աղոթքները:

Տնտեսության վրա կորոնավիրուսի ազդեցությունը մեղմելու համար Թուրքիայի ԿԲ-ն կրճատել է տոկոսադրույքը 100 բազիսային կետով՝ մինչեւ 9,75%, իսկ կառավարությունը հրապարակել է բիզնեսի աջակցման համար 15 մլրդ դոլարի օգնության փաթեթը: