Թրամփը ստորագրել է կորոնավիրուսի ժամանակ օգնության ծրագրի վերաբերյալ օրինագիծը

ԱՄՆ նախագահ Դոնալդ Թրամփը ստորագրել է չորեքշաբթի ԱՄՆ Կոնգրեսի երկու պալատների հավանությունը ստացած օրինագիծը երկրի բնակիչների համար կորոնավիրուսի տարածման հետեւանքները մեղմելու ծրագրի վերաբերյալ: Այս մասին նշված է Սպիտակ տան մամուլի ծառայության տարածած հայտարարության մեջ, փոխանցում է ՏԱՍՍ-ը:

Օրինագծի շրջանակում բյուջեից կհատկացվի տասնյակ միլիարդավոր դոլար միլիոնավոր ամերիկացիների օգնություն ցուցաբերելու համար, որոնք տուժել են նոր կորոնավիրուսի առաջացրած հիվանդության բռնկման պատճառով: Նախաձեռնությունը կոչված է նաեւ մեղմելու որոշ տնտեսական դժվարություններ՝ ֆինանսական օգնություն տրամադրելով նրանց, ովքեր ճգնաժամից ավելի շատ են տուժել, ներառյալ գործազրկության նպաստները: Փող կհատկացվի հիվանդության պատճառով վճարովի արձակուրդի համար, իսկ ընտանեկան հանգամանքներով արձակուրդի միջոցները կմեծացվեն: Նախաձեռնությունը յուրաքանչյուր ամերիկացու նաեւ կապահովի կորոնավիրուսի ախտորոշման անվճար հետազոտության իրավունքով, անգամ եթե ապահովագրություն չունի: Կոնգրեսականները երկուշաբթի օրինագծում նաեւ «տեխնիկական շտկումներ» էին արել, որոնք, ըստ էության, կրճատել են հիվանդության դեպքում արձակուրդի համար հատկացվող միջոցները:

Ամերիկյան վարչակազմն ավելի վաղ Կոնգրեսից արդեն ստացել էր 8,3 մլրդ դոլար՝ համավարակի տարածումը զսպելու համար:

Ջոնս Հոփքինս համալսարանի տեղեկություններով, որը հաշվարկներ է կատարում դաշնային եւ նահանգային իշխանությունների տվյալների հիման վրա, երկրում վարակման դեպքերն անցել են 7,7 հազարից, մահացել է նվազագույնը 118 մարդ: