«Էջմիածնում 129 մարդու մոտ ջերմություն է գրանցվել». Վարչապետը մանրամասներ է ներկայացրել վարակված 30 անձանց մասին

Ինչպես արդեն Operativ լրատվականը հաղորդել էր, ՀՀ Վարչապետը ուղիղ միացմամբ հայտարարել էր, որ Ժամը 15.00-ին տեղի կունենա կառավարության արտահերթ նիստ. Կքննարկվի կորոնավիրուսի տարածումը կանխարգելելու նպատակով Հանրապետությունում արտակարգ դրություն մտցնելու հարցը:

Այս պահի դրությամբ մենք ունենք կորոնավիրուսի 30 դեպք, որից 19-ը Էջմիածնի հետ փոխկապակցված անձինք են, մեկ հոգի բուժվել է: Այս մասին Facebook-ի իր ուղիղ եթերում նշել է նա:

«Մնաց 10-ը, որից երեքը «Գոլդեն Փելիսում» մեկուսացված անձինք են, այդ թվում առաջին կինը: Մնաց 7-ը, որից երեքը արտադրական ձեռնարկություններից մեկում հայտնաբերված դեպքերն են, որի հետ կապված մենք հիմա մեկուսացման աշխատանքներ ենք իրականացնում:

Լավ լուրն այն է, որ մենք այս պահի դրությամբ ախտորոշել ենք մի շարք մարդկանց եւ Առողջապահության նախարարն ասում է, որ կարող ենք հույս ունենալ, որ այնտեղ վարակի ավելի լայն տարածում չունենք: Մնացած 4 դեպքերը առանձին դեպքեր են»,-ասել է վարչապետը:

Նրա խոսքով, Էջմիածնում 129 քաղաքացու մոտ ջերմություն է արձանագրվել. «Մենք նրանց խնդրել ենք վերադառնալ տտուն եւ ինքնամեկուսանալ: Ուզում եմ նրանց շնորհակալություն հայտնել դրա համար: Այն, որ իրենք ջերմություն ունեն, դեռ ոչ մի բան չի նշանակում»:

Նշենք նաև, որ այժմ Կառավարությունում ընթանում են քննարկումներ՝ Երկրում Արտակարգ իրավիճակի մտցման վերաբերյալ: