ԱՄՆ-ում կհայտնվի կորոնավիրուսի թեստավորման կայք

ԱՄՆ նախագահ Դոնալդ Թրամփն ուրբաթ հայտարարել է, որ երկրի կառավարությունը կորոնավիրուսի ստուգման սարք է թեստավորում, որը շուտով կստանա Google-ի աջակցությունը: Թրամփի խոսքով՝ ընկերությունը կայք կմշակի, որն ամերիկացիներին կօգնի որոշել՝ արդյոք կա կորոնավիրուսի ախտորոշման թեստ անցնելու անհրաժեշտություն, հայտնում է WIRED-ը:

Պարբերականը նշում է, թե միակ խնդիրն այն է, որ այս պահին այդպիսի կայք չկա: Ավելին՝ Google-ում անգամ պատկերացում չունեին, որ ԱՄՆ նախագահը հանդես կգա նման հայտարարությամբ:

Ընկերությունում աղբյուրը WIRED-ին ասել է, որ Google-ի ղեկավարությունը զարմացած էր մամուլի ասուլիսում Թրամփի այդ հայտարարությամբ, քանի որ նախագահի ասածից շատ բան իրականությանը չի համապատասխանում:

Կորոնավիրուսի թեստավորման կայքն աջակցություն է ստանալու ոչ թե Google-ից այլ դուստր ընկերություն Alphabet – Verily-ից:

«Մենք գործիք ենք մշակում Covid-19-ով անձանց թեստավորմանն օգնելու համար: Verily-ն մշակման վաղ փուլերում է եւ որոշ ժամանակ անց հետագա ընդլայնման հույս ունի»,- նշված է Google-ի հայտարարության մեջ:

The Verge պարբերականն ավելի վաղ հայտնել էր, որ Verily ընկերությունը մտադիր է կայք մշակել բժշկական ոլորտի աշխատակիցների համար: Սակայն Դոնալդ Թրամփի անսպասելի հայտարարությունից հետո ընկերությունը որոշել է այն հասանելի դարձնել բոլորի համար, սակայն ներկայումս մարդկանց կորոնավիրուսի թեստավորման մասին տեղեկություններով կարող է ապահովել միայն Սան Ֆրանցիսկոյի շրջանում:

Verily-ի մամուլի ծառայությունից այս տեղեկությունը փոքր-ինչ այլ կերպ են մեկնաբանել:

«Սկզբնապես մենք ծրագրել էինք կենտրոնանալ բնակչության բարձր ռիսկով շերտերի վրա, որոնց մեջ են մտնում նաեւ բժշկության ոլորտի աշխատակիցները, սակայն դա միայն նրանց համար չէր մտահղացվել: Այս նախաձեռնության շրջանակում մենք համագործակցում ենք Quest Diagnostics եւ Labcorp կազմակերպությունների հետ, ինչպես նաեւ տեղական կազմակերպությունների հետ՝ որոշելու համար, թե ինչն ամենից լավ կգործի: Ընկերությունը կենտրոնացած է գործիքի մշակման վրա, որը կոչված է թեստավորման հարցում մասնավոր անձանց օգնելուն»,- նշել են ընկերությունից:

Պարբերականը նշում է, որ Սպիտակ տնից չեն մեկնաբանել ԱՄՆ նախագահի հայտարարությունը, բայց նաեւ չեն հերքել, որ Google ընկերությունը ԱՄՆ նախագահի այդ հայտարարության մասին տեղեկացված չէր: