Մարդկանց համոզելու հնարքներ

1. Առաջինը նշեք ձեր պայմանները

Բազմաթիվ հոգեբաններ աշխատանք փնտրողներին խորհուրդ են տալիս առաջին հանդիպմանը չխոսել ցանկալի աշխատավարձի մասին, այլ կենտրոնանալ աշխատանքային որակների վրա: Բայց եթե տեսնում եք, որ որոշումն ընդունվել է ձեր օգտին, արժե դրսեւորել նախաձեռնողականություն եւ առաջինը նշել համագործակցության պայմանները. գործի է դրվում, այսպես ասած, հանգույցի էֆեկտը՝ ձեր նշած գումարը բացում է սակարկության տարածք եւ դառնում ելակետ՝ քննարկելու այլ մանրամասներ:

Վերջերս կատարված հետազոտությունը ցույց է տվել, որ եթե անգամ պահանջված աշխատավարձը ուռճացված է, բայց թեկնածուն պաշտոնի համար առաջինն է նշում իր պայմանները, գործատուն հոժարությամբ գնում է զիջումների: Իսկ երբ զրուցակիցն ինքն է առաջինը նշում գինը, բայց այն ձեզ չի գոհացնում, մտածեք՝ ամենայն հավանականությամբ նա տեղյակ է հանգույցի էֆեկտին եւ դիմել է մանիպուլյացիայի կամ էլ ընդհանրապես հակված չէ համագործակցության: Այդ դեպքում անցեք հակագրոհի՝ կարող եք հայտարարել, թե հնչեցված թիվը լուրջ չէ եւ նման առաջարկը ձեզ վիրավորում է, որից հետո զրուցակիցը ստիպված կլինի ընդհատել քննարկումը կամ էլ լսել ձեր պայմանները:

2. Փոխեք թեման

Բանակցողները փաստացի երբեք չեն սեւեռվում մեկ նյութի քննարկման վրա, եւ թեմայի փոփոխությունը թերեւս առավելի հաճախակի հնարքներից է, որ կիրառվում է բանակցություններում, հատկապես երբ անհրաժեշտ է քննարկել տարբեր դետալներ կամ դրանք առնչվում են մի քանի մարդու: Երբ բանակցությունը մտնում է փակուղի կամ ընթանում է կողմերից մեկի համար աննպաստ ուղղությամբ, բանակցողների համար արդյունավետ կլինի, եթե հետաձգեն խնդրահարույց հարցի քննարկումը եւ անցնեն մյուսին:

3. Առաջադրեք թվացյալ խնդիր

Այդ մարտավարությունը ենթադրում է բանակցության շեշտադրումների շփոթ, երբ կողմերից մեկն առաջադրում է երկրորդական հարց՝ իբրեւ սկզբունքային կարեւոր: Դա հնարավորություն է տալիս գնալու «զիջումների», որը զրուցակիցն ընկալում է որպես «մեծահոգի ժեստ», բանակցային հաջողություն եւ ինքն էլ մեծ պատրաստակամությամբ ընդառաջ է գալիս:

Զրուցակցի կեղծ զիջումներին հակազդելը շատ հեշտ է. ի վերջո, դուք միշտ էլ կարող եք անտեսել զրուցակցի շահերը, կեղծ կամ իրական զիջումները եւ առաջնորդվել միայն սեփական շահով, բայց փորձը ցույց է տալիս, որ այդ միջոցը, ըստ ամենայնի, կձախողի քննարկումը: Եթե ուզում եք վստահ լինել, որ զրուցակիցը մանիպուլյացիայի չի դիմում՝ ստեղծելով կեղծ խնդիրներ եւ հաղթականորեն լուծելով դրանք, պետք է մանրամասնորեն ուսումնասիրել նրա դիրքորոշումը եւ հասկանալ, թե զրուցակիցը ինչ է պատրաստ իսկապես զոհաբերել եւ ինչն է օգտագործում միայն որպես կեղծ դրամ:

4. Դիմեք բարձր ատյաններին

Բանակցությունների ընթացքը ձեր օգտին շրջելու արդյունավետ միջոցներից մեկն էլ  բարձր ատյաններին դիմելն է, այլ խոսքով, եթե զգում եք, որ ձեզ պարտադրում են ոչ շահավետ պայմաններ, հայտարարեք, որ ամբողջովին լիազորված չեք եւ պետք է ամեն բան քննարկեք ղեկավարության հետ...

Օգտագործելով այդ հնարքը՝ կարող եք խփել միանգամից երկու նապաստակ. նախ բանակցությունն ըստ էության կանգ է առնում, եւ այն շարունակելու համար՝ մյուս կողմը կարող է գնալ փոխզիջման, եւ երկրորդ՝ այդպես ապահովագրում եք ինքներդ ձեզ՝ հասկացնելով զրուցակցին, որ խնդիրը ձեր մեջ չէ: Եթե նման մարտավարություն կիրառում են ձեր դեմ, կարելի է հանդիպում պահանջել վերադասի հետ, որը իրավասու է հարթելու ծագած անհամաձայնությունը:

Հիշեք, որ բանակցություններում շահում է նա, ով օժտված է մեծ համբերությամբ, ուստի փորձեք զրուցակցի մեջ արթնացնել ցանկություն՝ հնարավորինս շուտ ավարտելու ապարդյուն վեճը:

5. Ապավինեք ձեր լավագույն այլընտրանքային տարբերակին

Միշտ կա վտանգ, որ բանակցությունները վերջնականապես եւ անշրջելիորեն կմտնեն փակուղի, ուստի դուք պետք է ունենաք, այսպես կոչված, համաձայնության լավագույն այլընտրանքային տարբերակ (ՀԼԱՏ): Եթե իսկապես գիտակցում եք ձեր ՀԼԱՏ-ը, ապա անմիջապես կռահում եք՝ գործարքը շահավետ կլինի թե ոչ, եւ արագորեն կողմնորոշվում եք: Վատ չի լինի նաեւ, եթե փորձեք պարզել զրուցակցի ՀԼԱՏ-ը՝ հասկանալու համար, թե նա ինչպիսի զիջումների է պատրաստ: Լավագույն այլընտրանքային տարբերակների հստակ իմացությունը բանակցությունները հաջողությամբ վարելու էական պայմաններից մեկն է:

Աղբյուրը՝ Woman.ru