Զոհված 23-ամյա զինծառայողը Գորիսից էր, որպես լեյտենանտ էր ծառայում (Լուսանկարներ)

Երեկ զոհված զինծառայող 23-ամյա Հայկ Ասրյանը Սյունիքի մարզի Գորիս քաղաքի բնակիչ էր: 

Հայկը ավարտել է Գորիսի Ակսել Բակունցի անվան դպրոցը` բարձր առաջադիմությամբ:

Սովորել է Արմենակ Խամփերյանցի անվան ռազմական ավիացիոն համալսարանում: Մինչ այդ ավարտել է Երևանի պետական համալսարանի Ինֆորմատիկայի և կիրառական մաթեմատիկայի ֆակուլտետը, մասնագիտությամբ ծրագրավորող էր:

«Հայկը ծառայության էր անցել 2018 թվականի հուլիսից, որպես լեյտենանտ էր ծառայում: Հայրը ճանշինում է աշխատում: Իրենից փոքր եղբայր ունի եւ քույր: Շատ լավ մարդ, խելացի տղա է եղել, ամբողջ համայնքը ցավում է: Չգիտենք, չենք պատկերացնում ինչը կարող էր մահվան պատճառ լինել, սպասում ենք պաշտոնական տեղեկատվության»,- ասել է Գորիսի քաղաքապետի տեղակալ Մենուա Հովսեփյանը:

Հիշեցնենք, որ ՊԲ արևելյան ուղղությամբ տեղակայված զորամասերից մեկի պահպանության տեղամասում, դեռևս չպարզված հանգամանքներում, փետրվարի 14-ին մահացու հրազենային վիրավորում է ստացել ՊԲ պայմանագրային զինծառայող, 1997թ. ծնված Հայկ Ներսեսի Ասրյանը:

Operativ լրատվականը ավելի վաղ հայտնել էր, որ Հայկն օրեր առաջ ֆեյսբուքյան իր էջում կիսվել էր զինվորի աղոթքով՝ «Սահմանապահ զինվորների աղոթքը դիրքեր բարձրանալուց առաջ…. Աստված միշտ Ձեր թիկունքին լինի…»,- գրված էր այնտեղ։