Դրեյփերի համալսարանում սովորելու մրցույթի 109 հայտից հաղթել են 5-ի հեղինակները

Դրեյփերի համալսարանում պետական կրթաթոշակով սովորելու համար հայտարարված մրցույթի արդյունքներն արդեն հայտնի են: Սա ՀՀ բարձր տեխնոլոգիական արդյունաբերության նախարարության  հայտարարած կրթական ծրագրերից մեկն է, որը հնարավորություն կտա հայ ձեռնարկատերերին սովորել Սիլիկոնյան հովտի հեղինակավոր կրթական կենտրոններից մեկում՝ Դրեյփերի համալսարանում: Այս մասին հայտնում են ԲՏԱ նախարարության մամուլի ծառայությունից։

Փետրվարի 13-ին ՀԲԸՄ դահլիճում տեղի է ունեցել ծրագրի  հաղթողների ընտրության եզրափակիչ փուլը:  Նույն օրը համագործակցության պայմանագիր է ստորագրվել  ՀՀ բարձր տեխնոարդյունաբերության նախարարության և Դրեյփերի համալսարանի միջև, որը նախատեսում է մի շարք համատեղ ծրագրերի իրականացում: Հաղթողները  համալսարանում ուսանելու կմեկնեն գարնանը։

Պայմանագրի ստորագրմանը նախորդել է սեպտեմբերին ՀՀ վարչապետ Նիկոլ Փաշինյանի այցի ընթացքում հուշագրի ստորագրման արարողությունը:

ՀՀ ԲՏԱ նախարար Հակոբ Արշակյանը շնորհակալություն է հայտնել բոլոր մասնակիցներին և Դրեյփերի համալսարանի  ներկայացուցիչներին՝  բուհի նախագահի գլխավորությամբ, որոնք այս օրերին Հայաստան են ժամանել մրցույթի եզրափակիչ փուլին ներկա գտնվելու և հաղթողներին ընտրելու համար: 

Ողջունելով ներկաներին՝ Հակոբ Արշակյանն անդրադարձել է Դրեյփերի  համալսարանի նախագահի հետ հանդիպման մանրամասներին: «Հայ ինժեներների պատասխանատվությունը կարեւոր առանձնահատկություն է. եթե հայերը մի բան ասում են, որ կանեն, ուրեմն՝ անում են: Եվ դա անում են ժամանակին եւ մեծագույն պատասխանատվությամբ: Սա կարեւոր, բացառիկ հատկանիշ է, որի մասին աշխարհում խոսում են, և խոսում են այնպիսի մարդիկ, ինչպիսին Դրեյփերի համալսարանի նախագահն է: Դա նշանակում է, որ շատ շատերը Հայաստանն ընտրելու են, որովհետեւ մենք պատասխանատու ենք»,- ընդգծել է նախարարը:

Դրեյփերի համալսարանի նախագահ Ասրա Նադիմը շնորհակալություն է հայտնել բարձր տեխնոարդյունաբերության նախարարությանն արդյունավետ համագործակցության համար: «Սովորաբար պետական կառավարման մարմինների հետ աշխատանքը շատ երկար է տևում, սակայն Հայաստանի հետ համագործակցությունը բավականին արագ ստացվեց: Ես անչափ ուրախ եմ, որ մենք միասին ստեղծում ենք Հայաստանի և Սիլիկոնյան հովտի միջև այս կամուրջը՝ ոգևորելու և ոգեշնչելու մարդկանց, որպեսզի հիմնեն ընկերություններ և զարգացնեն իրենց միջավայրը»,- նշել է նա:

Դրեյփերի համալսարանում սովորելու պետական կրթաթոշակ ստանալու համար ստացվել էր 109 հայտ, որոնցից 5-ը՝ «ForestGuard», «eSwap», «Yolo», «OORES», «ForheFiction», արժանացան հաղթողի կոչման: Եվս 3 գաղափարի հեղինակի հաճելի անակնկալ էր սպասվում Դրեյփերի համալսարանի կողմից. «Robin», «Cerebrus», «Garoon» ծրագրերի հեղինակները ստացան կրթաթոշակի մասնակի փոխհատուցում համալսարանի ներկայացուցիչների կողմից:

Հակոբ Արշակյանը շնորհավորել է բոլոր հաղթողներին և հիշեցրել, որ այս տարի Դրեյփերի համալսարանում սովորելու համար եւս 2 անգամ մրցույթ կհայտարարվի: Մեկ այլ ծրագրով 30 հայ ձեռնարկատերեր կմեկնեն Սիլիկոնյան հովիտ՝  դասընթացների մասնակցելու:

Այս տարի կբացվի նաև հայ ձեռնարկատերերի մշտական ներկայացուցչությունը Սիլիկոնյան հովտում, որը կհամախմբի ոլորտի հայ մասնագետներին Հայաստանի սահմաններից դուրս: