Սովորական երրորդ դասարանցի տղայի դիմանկարն անսպասելիորեն հայտնվել է Բրեդ Փիթի մոտ

Ուոունեյքի գյուղից (Վիսկոնսին նահանգ, ԱՄՆ) երրորդ դասարանցի Չեյզ Մո անունով աշակերտը դպրոցում տնային աշխատանք է ստացել՝ ճանապարհորդության ուղարկել իր դիմանկարը այնպես, որ նկարն այցելի տարբեր մարդկանց եւ վերադառնա: Տղայի բախտը բերել է. նրա աշխատանքի հետ լուսանկարվել է հոլիվուդյան դերասան Բրեդ Փիթը։ Բայց ահա Չեյզի դասընկերները դա չեն գնահատել, քանի որ նրանց մեծ մասը չգիտեն, թե ով է Բրեդ Փիթը։ Այս մասին գրում է ABC News-ը։

Ամեն ինչ սկսվել է գրող Մայքլ Օ. Տունելի Mailing May գրքից, որը Չեյզը դպրոցում սովորել է իր դասընկերների հետ գրականության դասերի ժամանակ: Այս հեքիաթի հերոսուհին տատիկին այցելելու համար չի կարողանում գնացքի տոմս ձեռք բերել: Փոխարենը նա կշռվում է, իր վրա պիտակ պակցնում եւ որպես ծանրոց ուղարկվում տատիկին։

Այս պատմության նմանությամբ գրականության ուսուցչուհի Հիզեր Մեյը խնդրել է երեխաներին նկարել իրենց դիմանկարները եւ դրանք փոխանցել հարազատներից որեւէ մեկին: Նրանք, իրենց հերթին, պետք է փոխանցեն այլ մարդկանց, որպեսզի տեսնեն, թե որտեղ դրանք կարող են, ի վերջո, հասնել։ Նկարը ստացողները պետք է լուսանկարվեին դրա հետ։

Այդ մրցարշավում Չեյզն ի սկզբանե առաջատար է եղել, քանի որ նրա հայրը՝ Մայք Մոն, մարտարվեստի վարպետ եւ դերասան է, որը Քվենտին Տարանտինոյի «Մեկ անգամ Հոլիվուդում» ֆիլմում կատարել է Բրյուս Լիի դերը:

Գիլդիի մրցանակաբաշխության արարողության ժամանակ Մայք Մոն լուսանկարվել է Բրեդ Փիթի հետ, որտեղ հայտնի դերասանը ձեռքում պահում է Չեյզի դիմանկարը: Տղան այդ լուսանկարը փոխանցել է ուսուցչուհուն. լուսանկարն անգամ տեղադրել են դպրոցի ֆեյսբուքյան էջում:

Սակայն, ուսուցչուհու խոսքով, տպավորված են եղել միայն դպրոցի աշխատակիցները, քանի որ Չեյզի հասակակիցների մեծ մասն ուղղակի չգիտեն, թե ով է Բրեդ Փիթը։