ԱՄՆ նախագահի վարչակազմն արգելել է Ջոն Բոլթոնի գրքի հրատարակումը

ԱՄՆ նախագահի վարչակազմն արգելել է նախագահ Դոնալդ Թրամփի ազգային անվտանգության հարցերով նախկին խորհրդական Ջոն Բոլթոնի գրքի հրատարակումը, քանի որ գրքում գաղտնի տեղեկություն կա: Այս մասին ասվում է Բոլթոնի փաստաբանին ուղղված ԱՄՆ ազգային անվտանգության խորհրդի նամակում, հաղորդում է DW-ը:

«Գրքում կա գաղտնի տեղեկություն: Որոշ տեղեկություններ վերաբերում են նույնիսկ «բացարձակ գաղտնի» կատեգորիային… Գիրքը չի կարող հրատարակվել առանց գաղտնի տեղեկությունը հեռացնելու»,- ասվում է նամակում:

Բոլթոնի փաստաբան Չառլզ Կուպերը պատասխանել է նամակին՝ հայտնելով, որ ո՛չ ինքը, ո՛չ իր հաճախորդը չեն կարծում, թե գրքում որեւէ գաղտնի տեղեկություն կա:

The New York Times թերթն ավելի վաղ բացահայտել է գրքի որոշ մանրամասներ: Թերթի տեղեկություններով՝ Թրամփի նախկին խորհրդականը գրքում պատմում է, թե ինչպես է ԱՄՆ նախագահը հայտնել Ուկրաինային ռազմական օգնության դադարեցման մտադրության մասին, քանի դեռ Կիեւը չի սկսել առաջիկա նախագահական ընտրություններին նրա հնարավոր մրցակից Ջո Բայդենի եւ Բայդենի որդու նկատմամբ հետաքննությունը:

2019-ի դեկտեմբերին ԶԼՄ-ները հայտնել են, որ Թրամփի վարչակազմը սկսել է ռազմական օգնության դադարեցման գործընթացը Թրամփի եւ Ուկրաինայի նախագահ Վլադիմիր Զելենսկու՝ հուլիսի 25-ին կայացած հեռախոսազրույցից անմիջապես հետո:

Թրամփ-Զելենսկի հեռախոսազրույցի հրապարակումից հետո քաղաքական սկանդալ առաջացավ ԱՄՆ-ում, որը պատճառ դարձավ Թրամփի դեմ իմպիչմենթի պրոցեդուրա սկսելու համար: ԱՄՆ Սենատը հունվարի 21-ին սկսել քննարկել Թրամփի հասցեին մեղադրանքները: