Մարկոս Պիզելին՝ ֆուտբոլային կարիերայի ավարտի մասին (Տեսանյութ)

Հայաստանի չեմպիոն «Արարատ-Արմենիա» տեղափոխված, Հայաստանի հավաքականի նախկին կիսապաշտպան Մարկոս Պիզելին ներկայացրել է ֆուտբոլիստի կարիերան ավարտելու որոշում ընդունելու պատճառը:

«Մեկ տարի առաջ լուրջ վիրահատության եմ ենթարկվել: Ֆուտբոլից տեղյակ մարդիկ գիտեն, որ նման վիրահատությունից հետո պետք է միշտ մարզվել: Մեկ ամիս առաջ Բրազիլիայում մարզման ժամանակ ցավեր զգացի ծնկի շրջանում, սակայն դրանք ինձ չէին խանգարում, և ես որոշեցի պայմանագիր կնքել «Արարատ-Արմենիայի» հետ: Այդ ակումբը մեծ ամբիցիաներ ունի, և ես հենց այդ պատճառով ընտրեցի «Արարատ-Արմենիան»:

Հայաստան վերադառնալուց հետո բուժզննում անցա, և պարզ դարձավ, որ ինձ մոտ կրկին խնդիր է առաջացել ծնկի շրջանում: Բժիշկներն ասացին, որ ինձ վիրահատություն է հարկավոր, սակայն ես արդեն 35 տարեկան եմ և ճիշտ գտա ավարտել կարիերաս:

Շատ տխուր եմ, քանի որ շատ եմ սիրում Հայաստանը և շատ կուզենայի օգտակար լինել «Արարատ-Արմենիային»: Կյանքը շարունակվում է, և ես լավագույնն եմ ցանկանում «Արարատ-Արմենիային»»,- Պիզելիի խոսքը փոխանցում է «Արարատ-Արմենիայի» մամուլի ծառայությունը:

Ավելի վաղ տեղեկացրել էինք, որ Բրազիլիայում անհատական պարապմունքների ժամանակ ստացած վնասվածքի պատճառով Մարկոսը հավելյալ բուժզննում է անցել Հայաստանում և պարզ է դարձել, որ ֆուտբոլիստին անհրաժեշտ է վիրահատություն, որից նա հրաժարվել է և որոշել ավարտել իր կարիերան:

Մարկոս Պիզելին «Արարատ-Արմենիայի» կազմում Հայաստանի առաջնության առաջիկա հանդիպումներին պատրաստվելու նպատակով Երևան էր ժամանել հունվարի 7-ին:

Հայաստանի ազգային հավաքականի կազմում 35-ամյա կիսապաշտպանը մասնակցել է 68 հանդիպման՝ դառնալով 11 գոլի հեղինակ:

Մարկոս Պիզելին հանդես է եկել նաև Երևանի «Արարատում», «Փյունիկում», Դոնեցկի «Մետալուրգում», Կրասնոդարի «Կուբանում» և «Կրասնոդարում», Սաուդյան Արաբիայի առաջնությունը ներկայացնող «Ալ-Ռայեդում», ԱՄԷ-ի առաջնությունը ներկայացնող «Ալ-Շաբաբում», «Ալ-Ֆուջարիայում», նաև հունական «Քսանտիում»: