Դժվար է հիշել մի որեւէ Ամանոր, երբ կեսգիշերին հիմն է հնչել, չնայած դա օրենքի պահանջ է. Վահագն Թեւոսյան

Դժվար է հիշել մի որեւէ Ամանոր, երբ կեսգիշերին հիմն է հնչել, չնայած դա օրենքի պահանջ է: Այս մասին Facebook-ի իր էջում գրել է ԱԺ «Իմ քայլը» խմբակցության անդամ Վահագն Թեւոսյանը ֆեյսբուքյանը:

Նա, մասնավորապես, նշել է. «Երեկ Հեռուստատեսության եւ ռադիոյի հանձնաժողովը նիստ է հրավիրել՝ քննարկելու համար Ամանորի գիշերը մի շարք հեռուստաընկերությունների կողմից ՀՀ հիմնը չհեռարձակելու հարցը:

Նախ արձանագրենք, որ դժվար է հիշել մի որեւէ Ամանոր, երբ կեսգիշերին հիմն է հնչել, չնայած դա օրենքի պահանջ է (գուցե ես եմ սխալ հիշում, եթե այդպես է՝ ներողություն): Բացի այդ, օրենքը սահմանում է, որ այդ պարտավորությունը հատկապես դրված է հեռուստաընկերությունների ուսերին: Բայց այս ամենը մի կողմ:

Երեկվա նիստի ընթացքում արձանագրվել է, որ ՀՌ մասին օրենքը ունի պահանջ, բայց այդ պահանջի չկատարման դեպքում չկա սահմանված պատժաչափ, ու վարույթ չի հարուցվել: Ստացվում է, որ հարցը մինչեւ այժմ թողնված է եղել կողմերի բարի կամքի դրսեւորմանը՝ հեռուստաընկերությունների դեպքում եթեր հեռարձակելու, իսկ ՀՌՀ դեպքում՝ ըստ տրամաբանության, որոշում կայացնելու, դա չանելու պարագայում զրկել, թե չզրկել լիցենզիայից:

Այսպիսի կիսատ կարգավորումները, որոշ դեպքերում նույնիսկ դրանց բացակայությունը աուդիովիզուալ մեդիածառայությունների մատուցման օրենսդրության մեջ քիչ չեն, ինչը խոցելի է դարձնում հեռուստաընկերությունների գործունեությունն ու չի սահմանում անելիքների ու սպասելիքների հստակություն: Առաջիկայում սպասվող բավական ծավալուն օրենսդրական բարեփոխումներում այդ ամենը հաշվի է առնվելու»: