«Հայերը տունը համարում են ամբողջ ընտանիքի հանդիպման եւ լավագույն ուտելիքի անփոփոխ վայրը». Մարկուս Սեմյուելսոն

Ամերիկյան PBS ալիքով սկսվել է «No Passport Required with Marcus Samuelsson» («Անձնագիր հարկավոր չէ Մարկուս Աեմյուելսոնի հետ») շոուի երկրորդ եթերաշրջանը։ Նոր եթերաշրջանի առաջին հաղորդումը նվիրված էր հայկական համայնքին ու մեր ազգային խոհանոցին։

Սեմյուելսոնը ծնունդով Եթովպիայից է, մեծացել է ճանապարհորդելով՝ Շվեդիայից մինչեւ Հոլիվուդ ու Գլենդել։ Այս անգամ նա որոշել է այցելել «Փոքր Հայաստան» շրջան, մի քանի հայկական ռեստորան մտնել, շփվել տարբեր երկրներից մեր հայրենակիցների հետ՝ Ռուսաստանից մինչեւ Եթովպիա եւ Եգիպտոս։ Նրան դուր է եկել ամեն ինչ՝ քաբաբից մինչեւ ղափամա։  

«Ես հասկացա՝ որքան տարբեր ու հետաքրքիր կարող է լինել հայկական համայնքը՝ լինեն գաղթականներ Իրանից, թե Թուրքիայից,- L.A. Weekly-ին տված հարցազրույցում ասել է Մարկուսը.- Դուք աշխարհագրական շատ մեկնակետեր ունեք, եւ դա հնարավորություն է տալիս սեփական մշակույթ տարբեր սովորույթներ ներմուծել։ Համայնքի ուժի մասին խոսում է գոնե այն, թե որքան ամուր է նա կապված այս սովորույթներին։ Անհավանական հետաքրքիր էր խոսել մարդկանց հետ եւ փորձել ամենահամեղ ճաշատեսակները։ Ես տեսա՝ որքան հպարտ են իմ զրուցակիցները, որ հայ են եւ լոսանջելեսցի միեւնույն ժամանակ… Կան հայ խոհարարաներ, որոնք հմտորեն համադրում են հայկական ավանդական խոհանոցն ու բաղադրիչները, որոնք կարելի է գտնել միայն ֆրանսիական ռեստորաններում։ Որոշներն, օրինակ, ֆուա-գրան օգտագործում են նրբերշիկի հետ։ Ես զարմացած էի՝ որքան յուրօրինակ են օգտագործվում նույն դդումը կամ կաթնամթերքը»...

Սեմյուելսոնի խոսքով՝ Լոս Անջելեսը ուտելիքի քաղաք է, եւ դրանք ոչ միայն ռեստորաններ են, այլեւս ֆուդ-տրեքերը կամ շուկաները։ «Անկախ սնվելու համար ամենատարբեր վայրերի առատությունից, հայերը տունը համարում են ամբողջ ընտանիքի հանդիպման եւ լավագույն ուտելիքի անփոփոխ վայրը»...

Աղբյուրը՝ LA Weekly