Հակաիրանական տրամադրությունները ուժեղ են Ադրբեջանում. փորձագետ

Ադրբեջանցիները փորձեցին համացանցում եւ տարբեր կայքերով ապատեղեկատվություն տարածել, որ Իրանում հայերին վարկաբեկեն, սակայն նրանք իրենց նպատակին չհասան մեր կողմից պատասխան միջոցառումների պատճառով: Այս մասին հունվարի 9-ին լրագրողների հետ հանդիպման ժամանակ ասաց ադրբեջանագետ Տարոն Հովհաննիսյանը:

Նրա խոսքով հակաիրանական տրամադրությունները Ադրբեջանում ուժեղ են, եւ անգամ իշխանությունները, տեսնելով, որ իրավիճակը կարող է վերահսկողությունից դուրս գալ, փորձում են դրան ամեն կերպ հակազդել, որպեսզի հարեւանների հետ իրենց հարաբերությունները չսրեն: «Նույնիսկ հայտարարություններ հնչեցին Իսլամական հեղափոխության պահապանների կորպուսի գեներալ Ղասեմ Սոլեյմանիի հայամետ դիրքորոշման մասին՝ ղարաբաղյան պատերազմի ժամանակ նրա կողմից հայերին աջակցելու առումով, եւ այն մասին, որ նա հայերին համակրում էր, եւ որ նրա հետ զոհված զինվորականների թվում եղել են էթնիկ հայեր: Ադրբեջանցիները փորձում էին ցուցակներում եւ զոհվածների ազգանուններում հայկական հետք գտնել»,- ասաց Հովհաննիսյանը:

Սակայն, ինչպես հավաստիացրեց փորձագետը, չնայած Բաքվի բոլոր ջանքերին եւ ապատեղեկատվությանը, հայկական կողմի պատասխան գործողություններն ավելի արդյունավետ էին եւ ցանկալի արդյունք տվեցին: «Ադրբեջանցիների հակահայկական քարոզչությունը չհաջողեց: Արդյունքում հայտնաբերվել են Ադրբեջանում տիրապետող հակաիրանական տրամադրություններ»,- վստահ է նա:

Ի պատասխան այն հարցին, թե Իրանում արդյոք Ադրբեջանին դիտարկո՞ւմ են որպես տարածաշրջանում հնարավոր հակառակորդի՝ Իսրայելի եւ ԱՄՆ-ի հետ Բաքվի ակտիվ համագործակցության պատճառով, փարձագետը նշեց, որ Թեհրանում հնարավոր է եւս ենթադրում են Բաքվի եւ Վաշինգտոնի որոշակի համագործակցության մասին, սակայն տարածքում ամերիկացի զինվորականների առկայության մասին առայժն խոսելու անհրաժեշտություն չկա, քանի որ այդ մասին պաշտոնական տղեկություններ չկան:

«Վերջին տարիներին ԱՄՆ-ն Ադրբեջանին 100 մլն դոլար է տրամադրել հարավում եւ Կասպիցում, այսինքն՝ ըստ էության, Իրանի հետ իր սահմանների ամրապնդման համար»,- միաժամանակ հավելեց Տարոն Հովհաննիսյանը: