ԱՄՆ տախտակամածային ավիացիայի համար ճապոնական կղզում մինչև 2024 թվականը կկառուցվի օդանավակայան

ԱՄՆ ՌԾՈւ ավիակիրներից տախտակամածային ավիացիայի զորավարժանքների անցկացման համար մինչեւ 2024 թվականը Տոկիոյի միջոցներով օդանավակայան եւ այլ օբյեկտներ կկառուցվեն անմարդաբնակ Մագե կղզում (Ճապոնիայի հարավ-արեւմուտք, Կագոսիմա պրեֆեկտուրա)։ Այս մասին տեղեկացրել է Yomiuri shimbun թերթը՝ հղում կատարելով կառավարական աղբյուրներին, հաղորդում է ՏԱՍՍ-ը։

Օբյեկտի շինարարությունը, ըստ տվյալների, կսկսվի 2022 թվականին, իսկ ավիացիայի զորավարժությունները նախատեսվում է սկսել 2025 թվականից։

Դեկտեմբերի սկզբին Տոկիոն հայտարարել էր, որ Ճապոնիայի պաշտպանության նախարարությունը պայմանավորվել է 16 մլրդ իենով (մոտ 146 մլն դոլար) գնել անմարդաբնակ Մագե կղզին, որը մինչ այդ պատկանում էր մասնավոր մի ընկերության Տոկիոյից։

Ավիացիայի զորավարժությունները, որոնց ընթացքում կկատարվեն ինքնաթիռների թռիչք-վայրէջքներ ավիակիրների տախտակամածին, ուղեկցվում են աղմուկով եւ Ճապոնիայում առաջ են բերում բնակչության եւ տեղական ինքնակառավարման մարմինների բողոքները։ Այդ պատճառով դրանք Ացուգի բազայից տեղափոխվել են Տոկիոյից հարավ-արեւմուտք, համարյա անմարդաբնակ Իվոձիմա կղզի։ Սակայն այն Տոկիոյից հեռու է ավելի քան 1200 կիոմետր։

Արդյունքում՝ դեռեւս 2011 թվականին երկու երկրների զինվորականները որոշել են մշակել Մագե կղզում, 8 քառակուսի կիլոմետր մակերեսի վրա, օդանավակայան կառուցելու հարցը։ Այն գտնվում է ճապոնական գլխավոր Հոնսյու կղզում, ԱՄՆ Իվակունիի ծովային հետեւակի ավիաբազայից 400 կիլոմետր հեռավորության վրա, այստեղ այժմ տեղափոխվել է ամերիկյան տախտակամածային ավիացիայի մոտ 60 օդանավ։ Մագեի օբյեկտը համատեղ կօգտագործվի ԱՄՆ եւ Ճապոնիայի զինված ուժերի կողմից։