Արք. Արամ Աթեշյանը շնորհավորել է նոր պատրիարք Սահակ Մաշալյանին

Պոլսո Հայոց պատրիարքարանի Կրոնական ժողովի ատենապետ, պատրիարքի թեկնածու արքեպիսկոպոս Արամ Աթեշյանը ֆեյբուքյան իր էջով շնորհավորել է նորընտիր պատրիարք եպիսկոպոս Սահակ Մաշալյանին։

«Որպես Պոլսո աթոռի հոգեւորականների դասի երիցագույն անդամ, մաղթում ենք, որ այս նոր շրջանում թուրքահայ ազգային–եկեղեցական կյանքի ներսում վերահաստատվի միասնականությունն ու եղբայրությունը։ Մեր աղոթքն է, որ այս դարավոր Պատրիարքարանի Աթոռի առջեւ բացվի ծաղկուն նոր շրջան եւ նրա առաքելությունը արգասավոր լինի նոր ձեռքբերումներով։

Տերըն անսասան պահի Պոլսո Հայոց պատրիարքությունը եւ իր Սուրբ Հոգին անպակաս լինի մեր հավատացյալ ժողովրդի վրայից»,–գրել է արք. Արամ Աթեշյանը։

Հիշեցնենք, քիչ առաջ հայտնել էինք, որ Պոլսո Հայոց պատրիարք է ընտրվել Սահակ Մաշալյանը։ Պոլսո Հայոց 85–րդ պատրիարքի ընտրությունը կատարել են 119 պատվիրակները։ Այդ պատվիրակները դեկտեմբերի 7–ին եւ 8–ին, որոնցից 17–ը ընտրվել են Պատրիարքության միաբանությունից, իսկ 102–ը՝ Պոլսո հայ համայնքի կողմից։ Աշխարհիկ պատվիրակներից 89–ը հենց Սահակ Մաշալյանի կողմնակիցներն են, այսինքն, արդեն դեռեւս 8–ին պարզ էր, որ պատրիարք է ընտրվելու հենց Մաշալյանը։

Պատրիարք ընտրելու համար պատվիրակների ընտրությանը մասնակցել է 13704 հայ։

Նշենք, 2019–ի որ մարտի 8-ին՝ 63 տարեկան հասակում Ստամբուլում երկարատեւ հիվանդությունից հետո մահացել է Պոլսո Հայոց պատրիարք Մեսրոպ Մութաֆյանը։

Պատրիարքը երկար տարիներ գամված էր անկողնում եւ չէր կարողանում կատարել պարտականությունները։ Թուրքիայի կառավարության որոշմամբ պատրիարքի պարտականությունները իրականացնում է արք. Արամ Աթեշյանը։

Պատրիարքի մահից հետո տեղի ունեցան Պատրիարքական փոխանորդի ընտրությունները եւ պատրիարքական տեղապահ դարձավ եպիսկոպոս Սահակ Մաշալյանը։

Այնուհետ կազմվեց նախաձեռնարկ մարմին եւ դիմում տրվեց Թուրքիայի ՆԳ եւ Ստամբուլի նահանգապետարան՝ պատրիարքի ընտրության անցկացման համար։

Թուրքիայի ՆԳՆ–ը Հայոց պատրիարքարան ուղարկած կանոնակարգի մեջ սկանդալային սահմանափակում էր մտցրել, ըստ որի այս ընտրություններին չեն կարող մասնակցել Ստամբուլում ծնված եւ ներկայում աշխարհի այլ վայրերում ծառայող հայ հոգեւորականները։ Սա մեծ աղմուկ բարձրացրեց հայ համայնքում, սակայն այս սահմանափակումից հետո առանձնապես աղմկում չբարձրացրեցին եւ ընտրություններին գնացին թե արքեպիսկոպոս Աթեշյանը, թե եպիսկոպոս Մաշալյանը։

Թուրքիայի խորհրդարանի հայ պատգամավոր Կարո Փայլանը հայտարարել է, թե այս պայմաններում ընտրված պատրիարքին չի համարում իր պատրիարքը։