Բարձրակարգ շեֆ խոհարար Օլեգ Կոլիսնիչենկոն Երեւանի «Չայխոնա» ռեստորանում բացառիկ ընթրիք է պատրաստել (Լուսանկարներ)

Երեւանի «Չայխոնա» ռեստորանում Baklachoff Collection ընկերության հրավերով գաստրո ընթրիք է տեղի ունեցել «Աջ ափ» ընկերությունների խմբի եւ Novikov Group-ի բարձրակարգ շեֆ խոհարար Օլեգ Կոլիսնիչենկոյի մասնակցությամբ:

Օլեգ Կոլիսնիչենկոն ավարտել է Կիեւում ռեստորանային բիզնեսի դպրոցը, 2012 թվականին վերապատրաստվել է Թուրինի, Մադրիդի եւ Սան Ֆրանցիսկոյի ռեստորաններում: Բացի այդ, Օլեգը մասնակցել է հաստատությունների բացման, աշխատել է սու-շեֆ եւ շեֆ խոհարար Ուկրաինայում եւ Ռուսաստանում ֆրանսիական, իտալական եւ միջերկրածովյան խոհանոցների ռեստորաններում: 2014 թվականից  Դոնի Ռոստովի «Յալլա» ռեստորանի շեֆ խոհարարն է: NEWS.am-ին հաջողվել է կապ հաստատել Օլեգի հետ մինչև ընթրիքը, բացահայտել նրա վարպետության որոշ նրբություններ եւ հարցրել հայկական խոհանոցի մասին…

Այսպիսով, ի՞նչ է սպասվում մեր գուրմաններին

Նրանց դատին կհանձնվեն հատուկ ուտեստներ՝ «Թարթար՝ տավարի մսով եւ կարմիր խավիարով», «Բրյուսելյան կաղամբ», «Սնկով աղանդեր»… Տավարի միսը պատրաստելիս առաջին հերթին պետք է այնպես անել, որ այն մնա տավարի միս, այլ ոչ թե վերածվի մեկ այլ բանի: Ցանկանում եմ հյուրերին լավ, խրխրթան բրյուսելյան կաղամբ մատուցել, տեղական մսով պատրաստված անսովոր ուտեստով զարմացնել…

Այսինքն՝ Դուք սիրում եք էքսպերիմենտներ…

Իհարկե: Այսօր սնկով դեսերտ կհամտեսենք։ Սունկ, շագանակ… Բաղադրիչներն, անշուշտ, ինձ հետ եմ բերել: Ես սեւ շիկասունկ եմ գնում «Գորյաչիյ կլյուչից», որը գտնվում է Կրասնոդարի երկրամասում: Դա կրեմ-բրյուլեի ջեռոցում պատրաստած տարբերակն է, ջրով շոգեխաշած, կեղեւով… Սակայն այդ ուտեստը տաք չի մատուցվում, այլ սառը. Ահա՛ թե որն է առանձնահատկությունը:

Ես այդ դեսերտով շատ վայրերում եմ ներկայանում, դա, կարծես, աշխատանքային թեմա լինի եւ շատ հետաքրքիր է հետեւել, թե ինչպես են մարդիկ այն փորձում, քննարկում…

Իսկ ո՞ր խոհանոցն է Ձեզ հոգեհարազատ

Գիտեք՝ Փարիզից հետո շատ դժվար էր… Տանը ես այլ մթերքներ, այլ սարքավորում, այլ ծախսեր, այլ շրջապատ ունեի… Սակայն ինձ համար թանկ դարձավ այն ամենը, ինչը կապված է ֆրանսիական խոհանոցի հետ: Այդ մարդիկ նկարիչներ են, գեղագետներ, նրանք ափսեի վրա պահպանում են համաչափությունը, չեն ծանրաբեռնում այն, հարգում են գունային գամման, խորհրդածում են կառուցվածքի շուրջ… Ես միշտ կարծել եմ, որ ֆրանսիական խոհանոցն իդեալական է, եւ որոշ ֆրանսիական սոուսներ օգտագործել ենք այսօրվա ընթրիքում: Բացի այդ, օգտագործել ենք իտալական եւ իսպանական խոհանոցների «հնարքները»…

Իսկ ի՞նչ կասեք հայկական խոհանոցի մասին, Ձեզ դուր գալի՞ս է։

Առաջին անգամ չեմ Հայաստանում, սակայն հայկական խոհանոցին ծանոթ եմ մակերեսորեն՝ խորոված, քյաբաբ, լահմաջո… Ի դեպ, իմ ռեստորանում երկու հայ կանայք են աշխատում, նրանք թխում են: Հայկական խոհանոցն ինձ համար այնքան էլ դյուրին չէ: Հասկանում եք, ես կարող եմ պատրաստել ցանկացած ծովամթերք, ցանկացած ձուկ, սակայն հայկական ուտեստները բարդ են: Երեկ մենք այցելեցինք Սեւան, Ծաղկաձոր, եղանք «Ջենտլմենի ուդաչի» եւ «Կավկազսկայա պլեննիցա» ռեստորաններում, իսկապես համեղ է հայկական խոհանոցը:

Նկատենք, որ հրավիրող կողմը՝Baklachoff Collection ընկերությունը, նույնպես տպավորություններն է ներկայացրել համագործակցությունից: Ընկերության օպերացիոն տնօրեն Արսեն Բակլաչյանն ասել է. «Մեզ համար կարեւոր է մշտապես հետեւել ժամանակակից գաստրո միտումներին եւ դրանք ներկայացնել շուկայում: Հենց այդ պատճառով Baklachoff Collection-ը նախաձեռնել է այս համագործակցությունը Օլեգ Կոլիսնիչենկոյի եւ այն ընկերությունների հետ, որոնք նա ներկայացնում է: Նրանք իրենց գործի իսկական պրոֆեսիոնալներ են ոչ միայն Ռուսաստանում, այլ նաեւ Եվրոպայում»…

Հասմիկ Կարապետյան

Աղբյուր՝ News.am