ԱՄՆ-ում դատապարտել են ֆլեշով Թրամփի կալվածք մուտք գործած չինուհուն

Չինուհի Յուցզին Չժանը, որն ապօրինաբար մտել էր ԱՄՆ նախագահ Դոնալդ Թրամփի Մար ա Լագոյի կալվածք, երկուշաբթի դատապարտվել է ութ ամսվա ազատազրկման, գրում է ՌԻԱ «Նովոստի»-ն՝ հղում կատարելով Washington Examiner պարբերականին։

Ավելի վաղ տեղեկացվել էր, որ սեպտեմբերին երդվյալ ատենակալները Չժանին մեղավոր են ճանաչել Թրամփի նստավայրի տարածք թափանցելու եւ կեղծ ցուցմունքներ տալու համար։

Պարբերականը տեղեկացնում է, որ նա կալանքի մեջ էր մարտին ձերբակալումից հետո, եւ նրան կարող են բաց թողնել մի քանի շաբաթ հետո։

Ապրիլի սկզբին չինուհին Չինաստանի երկու անձնագրով, չորս բջջային հեռախոսով եւ վնասաբեր ԾԱ ունեցող կուտակիչ ֆլեշով ապօրինաբար թափանցել էր ԱՄՆ նախագահ Դոնալդ Թրամփի Մար ա Լագոյի կալվածք Ֆլորիդայի հարավում։

Չժանը փորձել է Թրամփի նստավայրի պահապաններին համոզել, թե մտադիր է օգտվել լողավազանից, որը գտնվում է Մար ա Լագոյի տարածքում, եւ կարողացել է թափանցել կալվածք այն բանից հետո, երբ պահապաններից մեկը հաստատել է, որ նրա ազգանունը համընկնում է Մար ա Լագոյի փակ ակումբի անդամներից մեկի ազգանվանը։

Այն բանից հետո, երբ չինուհին հայտնվել է Թրամփի կալվածքի տարածքում, հայտարարել է, թե եկել է մասնակցելու չին-ամերիկյան ասոցիացիայի մի ինչ-որ միջոցառման ՄԱԿ հովանու ներքո, այն դեպքում, երբ իրականում նման միջոցառում նախատեսված չէր։ ԶԼՄ-ների տվյալներով՝ կինը անվտանգության աշխատակցին ցույց է տվել միջոցառման հրավերը, որը վերջինը չի կարողացել կարդալ, քանի որ տեքստը չինարեն էր։

Դրանից հետո կինը դուրս է հանվել Թրամփի կալվածքի տարածքից եւ կալանավորվել է։ Հարցաքննության ժամանակ նա տեղեկացրել է, թե իր չինացի ընկերը՝ Չառլզ անունով, իրեն ասել է, որ այցելի ՄԱԿ հովանու ներքո անցկացվող միջոցառմանը Փալմ Բիչում, որպեսզի քննարկի չին-ամերիկյան միջազգային տնտեսական հարաբերությունները ԱՄՆ նախագահի ընտանիքի որեւէ անդամի հետ։