Թուրք մոդելյորին 5 տարվա պատիժ է սպառնում երկրի նախագահին «վիրավորելու» համար

Թուրքիայի դատախազությունը գործ է հարուցել մոդելյոր Բարբարոս Շանսալի (Barbaros Şansal) դեմ այն բանի համար, որ նա իբր անցյալ տարի իր մի շարք թվիթներում վիրավորել է նախագահ Ռեջեփ Թայիփ Էրդողանին, հայտնել է նորությունների T24 կայքը։ Դատախազությունը Չանսալի համար հինգ տարվա բանտային կալանք է պահանջում։

Մեղադրական եզրակացության մեջ մեջբերվում են Շանսալի հինգ թվիթները, որոնց թվում մեկը, որտեղ ասվում է, թե «կառավարամետ Star թերթի մեկնաբանը գրում է, որ FETO-ն (այսպես են թուրքական իշխանություններն անվանում 2016թ․ հեղաշրջման փորձի մեջ մեղադրվող Ֆեթուլլահ Գյուլենի շարժումը – խմբ.), հնարավոր է, պլանավորում է սպանել Էրդողանին՝ նրան վարակելով ՁԻԱՀ-ով»։

Դիզայները թվիթը տեղադրել է ՁԻԱՀ-ի մասին «Փոխանցվում է արյան միջոցով» հոդվածի հետ միասին։ Նա նշել է, թե ծիծաղելի է համարում, որ արդարադատության նախարարությունը նման հետաքննություն է նախաձեռնել։

Մոդելյորը թերթերի վերնագրերում էր հայտնվել 2017թ․, երբ նրան ձերբակալել էին Կիպրոսի հյուսիսում եւ արտաքսել էին Թուրքիա՝ սոցիալական ցանցերում տեղադրած տեսանյութի համար, որում նա քննադատում էր Թուրքիայի իշխանություններին եւ ժողովրդին։ Օդանավակայանից դուրս գալիս նրա վրա զայրացած մարդիկ էին հարձակվել։

62-ժամյա Շանսալին այն ժամանակ դատապարտել էին 6 ամսվա եւ 20 օրվա ազատազրկման։