Դոնալդ Թրամփը «շատ ավելի վատն է», քան Ռիչարդ Նիքսոնը. Նենսի Փելոսիի հայտարարությունը

Ներկայացուցիչների պալատի խոսնակ Նենսի Փելոսին կարծում է, որ նախագահ Դոնալդ Թրամփը «շատ ավելի վատն է», քան Ռիչարդ Նիքսոնը՝ ասելով, թե նա պետք է հեռանա Սպիտակ տնից, եթե մտահոգվում է ԱՄՆ-ի մասին։

«Դա իսկապես տխուր է»,- ասել է Փելոսին CBS-ի հարցազրույցում՝ Թրամփին անվանելով «ինքնակոչ», որի խելքի բանը չէ գլխավոր հրամանատարի պաշտոնը։ «Ես նկատի ունեմ, որ այն, ինչ արել է նախագահ Թրամփը, շատ ավելի վատ է, քան այն, ինչ արեց Ռիչարդ Նիքսոնը։ Ինչ-որ պահի Ռիչարդ Նիքսոնը, մտահոգվելով երկրի մասին, ընդունեց, որ դա չի կարող շարունակվել»,- ասել է նա ԱՄՆ միակ նախագահի մասին, որը հրաժարական է տվել։

«Այս ամենի հետ կապված են այնքան իրավախախտումներ»,- նշել է նա՝ խոսելով Ուկրաինային կաշառելու մեղադրանքների հետաքննության մասին, որպեսզի հետաքննություն սկսվեր նախկին փոխնախագահ Ջո Բայդենի դեմ։

Նիքսոնը հրաժարական է տվել 1974 թվականին Ուոթերգեյթի սկանդալի պատճառով, Դեմոկրատական կուսակցության կենտրոնակայան թափանցելու հետ կապված։

«Երբ խոսքը վերաբերում է Միացյալ Նահանգների Սահմանադրության խախտմանը, ինչը խափանում է մեր ազգային անվտանգությունը, սպառնալիքի տակ դնում մեր ընտրությունների ազնվությունը, վիրավորում նախագահի երդումը պաշտոնն ստանձնելիս, ապա խոսքը իմփիչմենթի մասին է»,- ասել է Փելոսին։

«Խոսքը մեր դեմոկրատիայի մասին է, որը գտնվում է սպառնալիքի տակ այդ նախագահի պատճառով»։