Մեծ Բրիտանիայում ընտրարշավը պաշտոնապես սկսվել է

Չորեքշաբթի՝ նոյեմբերի 6-ին Մեծ Բրիտանիայում պաշտոնապես սկսվել է ընտրարշավը։ Դրա համար պաշտոնապես ցրվել է բրիտանական խորհրդարանի ներկա կազմը։ Արտահերթ ընտրությունները տեղի կունենան դեկտեմբերի 12-ին, իսկ առաջին նիստը նախատեսված է դեկտեմբերի 16-ին։ Երկրի վարչապետ Բորիս Ջոնսոնը մտադիր է այս ընտրությունների շնորհիվ դուրս գալ պատային իրավիճակից, որը կապված է «Բրեքզիթի» հետ, բայց դիտորդները համոզված չեն, որ դա նրան կհաջողվի։ Թեեւ նրա գլխավորած պահպանողականները սոցիոլոգիական հարցումներում առաջատար դիրքերում են, չի բացառվում, որ խոշոր կուսակցություններից ոչ մեկը բացարձակ մեծամասնություն չի ունենա, տեղեկացնում է «Նեմեցկայա վոլնա»-ն։

Բացի այդ, Մեծ Բրիտանիայում լուրեր են պտտվում մինչ այդ չհրապարակված հաշվետվության մասին, որը հոկտեմբերի 17-ից իբր գտնվում է Բորիս Ջոնսոնի տրամադրության տակ։ Դրանում դիտարկվում է Ռուսաստանի ենթադրյալ միջամտությունը «Բրեքզիթի» մասին ագիտացիոն արշավին 2016 թվականին, ներառյալ Պահպանողական կուսակցություն թափանցելու փորձերը, ինչպես նաեւ 2017 թվականի խորհրդարանական ընտրություններին։

Բացի այդ, հոդվածը հիմնված է բրիտանական հատուկ ծառայությունների տեղեկատվության վրա։ Խորհրդարանի պաշտոնական ցրումից առաջ ընդդիմությունը Ջոնսոնին կոչ է արել հրապարակել հաշվետվությունն ընտրություններից առաջ։ Կառավարության ներկայացուցիչն ասել է, որ զեկույցում հետաքրքիր տեղեկություն կա, եւ հարկավոր է ուսումնասիրել հրապարակման հնարավորությունները։