Փորձագետը պնդում է, որ Ջեֆրի Էփշտեյնը սպանվել է, ոչ թե ինքնասպան եղել

Ջեֆրի Էփշտեյնի եղբոր կողմից վարձված դատաբժշկական փորձագետը հայտարարել է, թե ապացույցները վկայում են այն մասին, որ ֆինանսիստը ոչ թե ինքնասպան է եղել, այլ սպանվել է։

Մայքլ Բադենի հայտարարությունը հակասում է ինքնասպանության մասին պաշտոնական վարկածին։ Նա նշել է, որ Էփշտեյնի վնասվածքները «առավել բնորոշ են եղել սպանությանը, ոչ թե ինքնասպանությանը»։ «Ես կարծում եմ, որ ապացույցները ավելի շատ մատնանշում են սպանություն, քան ինքնասպանություն»,- Fox News-ին ասել է նախկին բժշկական փորձագետ, նյույորքցի Բադենը, որը մասնակցել է դիահերձմանը։

Նրա խոսքերով, Էփշտեյնի վզի բազմաթիվ կոտրվածքները, մասնավորապես լեզվի տակի ոսկորի եւ վահանաձեւ կռճիկի կոտրվածքները «շատ անսովոր են ինքնասպանության համար»։

Էփշտեյնը օգոստոսի 10-ին մահացած էր հայտնաբերվել Նյու Յորքի խիստ ռեժիմի պատժիչ կենտրոնում։ Այնտեղ նա սպասում էր անչափահաս աղջիկների սեքս-թրաֆիքինգի մեղադրանքով դատին։

Նյու Յորքի գլխավոր բժշկական փորձագետ Բարբարա Սիմփսոնը որոշել էր, որ նա ինքնասպան է եղել, սակայն այդ վճիռը բողոքարկվել էր Էփշտեյնի փաստաբանների եւ նրա եղբոր՝ Մարկի կողմից։

66-ամյա Էփշտեյնը բազմամիլիոնանոց եկամուտ ունեցող հեջ-հիմնադրամի մենեջեր էր։ Նա անձամբ ծանոթ էր շատ հայտնի մարդկանց, այդ թվում բրիտանական արքայազն Էնդրյուի եւ ԱՄՆ նախագահ Դոնալդ Թրամփի հետ։