Եթե ԱՄՆ-Թուրքիա հարաբերությունները սրված չլինեին, երեկ ԱՄՆ Ներկայացուցիչների պալատը կընդունե՞ր Հայոց Ցեղասպանության ճանաչման բանաձևը. Նոր պատժամիջոցներ Թուրքիայի դեմ

Եթե ԱՄՆ-Թուրքիա հարաբերությունները սրված չլինեին, երեկ ԱՄՆ Ներկայացուցիչների պալատը կընդունե՞ր Հայոց Ցեղասպանության ճանաչման բանաձևը: Գուցե ոչ:

Ինչևէ, այսօր՝ հոկտեմբերի 30-ին ԱՄՆ Ներկայացուցիչների պալատը գրեթե միաձայն հավանություն է տվել Թուրքիայի դեմ պատժամիջոցներ սահմանելու մասին օրինագծին՝ Սիրիայում ռազմական գործողության, ինչպես նաեւ ռուսական Ս-400 համակարգեր գնելու պատճառով, փոխանցում է «ՌԻԱ Նովոստի»-ն:

«H.R. 4695-ի քվեարկությունն անցավ 403 կողմով, 16 դեմով»,- հաղորդվում է պալատի Twitter-յան էջում:

Օրինագծի համաձայն՝ այն պատճառով, որ Թուրքիան Սիրիա զորք է մտցրել եւ ռուսական ռազմական տեխնիկա է ձեռք բերել, առաջարկվում է պատժամիջոցներ սահմանել թուրք բարձրաստիճան անձանց դեմ, ներառյալ պաշտպանության նախարարի, արգելափակել թուրք պաշտոնյաների ակտիվները եւ պատժամիջոցներ սահմանել թուրքական բանկերի դեմ՝ Halk Bankasi-ի կամ Halkbank-ի:

Փաստաթղթով նաեւ հանձնարարվում է հետագա քննարկման համար Կոնգրես տվյալներ ներկայացնել Թուրքիայի նախագահ Ռեջեփ Էրդողանի ընտանիքի ԱՄՆ-ում ունեցած ակտիվների մասին:

Փաստաթուղթն այժմ պետք է ընդունի Սենատը: Դրանից հետո ստորագրելու համար այն կուղարկվի ԱՄՆ նախագահին: