Ամարյանը դեռ չի՞ հոգնել

Նախորդ տարի Հանքավանի ամառային «Շողիկ» ճամբարում Հայ ավետարանական եկեղեցու և Հայ ավետարանչական ընկերակցության կողմից անչափահաս երեխաներին դասավանդվել է սեռական դաստիարակություն, որի ընթացքում ցույց են տրվել էրոտիկ բնույթի տարբեր նկարներ, խոսվել է սեռական հարաբերությունների մասին: Երեկ լրագրողների հետ հանդիպման ժամանակ հայտնել է Քայքայիչ պաշտամունքից տուժածների աջակցության և վերականգնողական կենտրոնի տնօրեն Ալեքսանդր Ամարյանը:

Վայ Աստված իմ նորից, ինչքա՞ն կարելի է նույն հարցի շուրջ խոսել, ասուլիսներ հրավիրել, գոռալ-ճչալ, սեփական անձի վրա ուշադրություն հրավիրել: Ախր բավական է, էդ թեման էլ արդիական չէ ու նույնիսկ ձանձրալի է ասուլիսային իր բոլոր տարբերակներով ու դրևորումներով: Այն կամ պիտի թքել, կամ կուլ տալ...Ու այստեղ բնական հարց' Ամարյանը դեռ չի՞ հոգնել:

Այս տարվա ամառն ինչ սկսվել է Ալեքսանդր Ամարյանն ու նախկին վերապատվելին այս թեման են հնչեցնում: Հարցի առնչությամբ իր մեկնաբանություններով ու ասուլիսներով հանդես եկավ նաև դասախոսություն կարդացած բժիշկ Վրեժ Շահրամանյանը, ով բացատրեց, փորձեց հասկացնել, թեև այս ամենը հաշվի առնելով հասկացնելն ապարդյուն է, թե ինչն ինչոց է, բայց, ոնց երևում է, թեմային առնչվող գրանտը դեռ մնացորդ ունի սպառելիք... Զարմանալի են փաստարկումները. նախ խոսեցին պոռնոգրաֆիկ նյութերի մասին, հետո երբ զգացին դրանով «չափն անցել են», «ժանրային» փոփոխություն կատարեցին ու պոռնոգրաֆիան փոխարինվեց էրոտիկով ու հիմա էլ թմբկահարվում է այս տարբերակը: Հասկացանք, իսկ սեռական դաստիարակության ժամին, եթե սլայդներ կամ տեսանյութեր են օգտագործվում, դրանք պետք է լինեն «թեմատիկ», ասենք, «երեխան ծնվում է կաղամբի մեջ», կամ «երեխային բերում է արագիլը» տրամաբանությամբ ստեղծված: Այս դեպքում էլ ի՞նչ իմաստ ունի դասախոսությունը: Ի դեպ նման դասախոսությունները կարևոր են երեխայի առողջ սեռական դաստիարակության համար. ավելի լավ է նա ինֆորմացիա ստանա մասնագետից, քան փողոցից կամ համացանցից: Այլապես Ամարյանի նման պիտի ջատագովի «երեխան ծնվում է կաղամբի մեջ» և «երեխային բերում է արագիլը» գաղափարները: Սա արդեն նմանվում է անեկդոտի ժանր անցած' Սադոյանի մազութի պատմությանը, եթե մի քիչ էլ շարունակվի:

Արման Գրիգորյան