Արքայազն Ուիլյամն ու Քեյթ Միդլթոնն ընդունելության են գնացել տուկ-տուկով (Լուսանկարներ)

Քեյթ Միդլթոնն ու արքայազն Ուիլյամը, որոնք պաշտոնական այցով Պակիստանում են, Իսլամաբադում ընդունելության են մասնակցել, որը կազմակերպել է Պակիստանում Մեծ Բրիտանիայի բարձրագույն հանձնակատար Թոմաս Դրյուն։ Նրանք երեկույթին ժամանել են վագրի ու թռչունների նկարներով զարդարված մեքենայով, որը Պակիստանում տուկ-տուկ են անվանում, հայտնում է Daily Mail-ը։

Քեմբրիջի դուքսը միջոցառմանը ներկայացել է պակիստանյան Naushemian ապրանքանիշի հագուստով՝ երկար կիսավերարկու, որը Պակիստանում, Հնդկաստանում եւ Բանգլադեշում կրում են տոնական օրերին կամ պաշտոնական միջոցառումների ընթացքում, ինչպես նաեւ տաբատ եւ կոշիկներ։

Քեյթն իսկական արքայադստեր տեսք ուներ. նա ընտրել էր Jenny Packham-ի փայլուն երեկոյան զգեստը, ինչպես նաեւ պակիստանյան Onitaa ապրանքանիշի ականջօղերը։

Ընդ որում, թագավորական ընտանիքի երկրպագուներն ուշադրություն են դարձրել Քեյթի կազմվածքին։ Նրա հղիության մասին լուրերը թեժացել են այն բանից հետո, երբ հայտնի է դարձել, որ դուքսին եւ դքսուհուն ուղեկցող շքախմբում բժիշկ է ընդգրկված։ Մինչ այժմ արտերկիր մեկնելիս Քեյթն ու Ուիլյամն իրենց հետ բժշկի չեն տարել։