Կրեմլը վերջապես պատասխանեց

Կրեմլի ներկայացուցիչ ՌԴ նախագահի օգնական Յուրի Ուշակովն օրերս վերջապես ներկայացրեց Մոսկվայի պատասխանը կապված ԱՄՆ նախագահ Բարաք Օբամայի' ՌԴ նախագահ Վ. Պուտինի հետ հանդիպումը մերժելու հետ: Կրեմլի ներկայացուցչի խոսքով' «Մոսկվայի համար սպասելի էր դեպքերի նման զարգացումը և մենք պատրաստ էինք, որ հանդիպումը կհետաձգվի, հատկապես հաշվի առնելով մամուլում վերջին քննարկումներն ու ընդհանուր քաղաքական ֆոնը հաշվի առնելով, որոնք անռչվում են մասնավորապես Սնոուդենի խնդրին: Մենք պատրաստ ենք և' այցին, և' հետաձգմանը:

Ինչ վերաբերում է Սանկտ-Պետերբուրգում գագաթնաժողովին երկու նախագահների հնարավոր հանդիպմանը, ապա այն նախատեսված չի եղել նախապես, քանի որ մենք այն սպասումն ունեինք, որ կլինի լիարժեք ընդլայնված կազմով պաշտոնական այց: Հետևաբար հանդիպում չի լինի, քանի որ արդեն պլանավորված է նախագահ Պուտինի օրակարգը գագաթնաժողովի ընթացքին և բազմաթիվ երկկողմ հանդիպումներ կլինեն տարբեր երկրների ղեկավարների հետ»:

Հիշեցնենք, որ օգոստոսի 7-ին ԱՄՆ նախագահ Օբամայի վարչակազմը պաշտոնապես տեղեկացրել էր, որ ԱՄՆ նախագահը չի հանդիպի նախագահ Պուտինին, այլ այցով կլինի Շվեդիայում: Վաշինգտոնն այս քայլը մեկնաբանել է այն իրողությամբ, որ այս պահին գործնական տեսանելի առաջընթաց երկու երկրների հարաբերություններում չի նկատվում: Միաժամանակ, սակայն, նախագահ Օբաման կմասնակցի G20-ի Պետերբուրգյան գագաթնաժողովին:

«Մենք կշարունակենք աշխատել Ռոսաստանի հետ այն հարցերի շուրջ, որոնցում ընդհանուր տեսակետներ ունենք: Սակայն և ԱՄՆ նախագահը և ազգային անվտանգության հարցերով զբաղվող խորհրդականները այն կարծիքին են, որ նման բարձր մակարդակի հանդիպումներն այս պահին անիմաստ են»,- հայտարարել էր մինչ այս Սպիտակ Տան ներկայացուցիչ Բենա Ռոդսան:

Յուրի Ուշակովն ընդգծել է, որ Մոսկվան պատասխան հակադարձ քայլեր չի անի: Մոսկվան, նրա խոսքով, արդեն իր ափսոսանքն հայտնել է նման որոշման կապակցությամբ, սակայն և հրավերն ուժի մեջ է և կմնա ուժի մեջ: «Սա կարևոր է, որ երկու գերտերությունների ղեկավարները հանդիպեն ամենաբարձր մակարդակում: Սա ոչ միայն երկու գերտերությունների համար է անհրաժեշտ, այլ նաև համաշխարհային կայունության և անվտանգության ապահովման»,- եզրափակել է Ուշակովը:

Սպիտակ Տան մեկ այլ ներկայացուցիչ Ջեյ Քարնին այլ առիթով կարծիք էր հայտնել, որ Պուտինն ու Օբաման կհանդիպեն անպայման G20-ի Պետերբուրգյան գագաթնաժողովին, քանի որ ռուսական կողմն այդ գագաթնաժողովին և մասնակից է և հյուընկալող երկիր:

Թե ինչով կավարտվեն Սառը պատերազմի ուրվականն իր մեջ պարունակող դիվանագիտական այս «փոխհրաձգությունները», դժվար է ասել, սակայն այն, որ երկու երկրների հարաբերությունների վիճակն անտարակույս արտապատկերվում է ամբողջ աշխարհի քաղաքական տնտեսական կյանքի վրա, սա ակնհայտ է: Ամեն դեպքում մնում է հուսալ, որ կհաղթի ողջամտությունը և աշխարհի առաջատարները լեզու կգտնեն իրար հետ: