Խնդիր ունե՞ք մարզպետի դեմ, առի՞թ էր պետք ձեզ, բոլորն էլ հասկանում են, թե դու ինչ շոու եք սարքել. Նորաշենի գյուղապետի ԺՊ

Նորաշեն համայնքն էլի բնակիչներ ունի, որոնք այլ կարծիքի են. չի կարելի մարզպետի դեմ բողոքողների կարծիքը համարել ողջ գյուղի կարծիք: Այս մասին հայտարարել է Արարատի մարզպետ Գարիկ Սարգսյանի որոշմամբ Նորաշեն համայնքապետի ժամանակավոր պաշտոնակատար նշանակված Արտակ Հարությունյանը:

Նշենք, որ նորաշենցիները հավաքվել են մարզպետարանի դիմաց ու բողոքում են մարզպետի որոշման դեմ: Նրանք պնդում են, որ գյուղապետ Նորայր Գրիգորյանի լիազորություններն ապօրինի կերպով են դադարեցվել եւ պահանջում են վերականգնել նրան այդ պաշտոնում:

«Եթե այդքան համոզված եք, որ Նորայր Գրիգորյանն ընտրված, սիրելի համայնքապետ է, ընդամենը 2 ամիս հետո պետք է լինեն արտահերթ ընտրություններ: Նորայր Գրիգորյանի լիազորությունները դադարեցրել է կառավարությունը, իսկ պաշտոնակատարին նշանակել է մարզպետը: Այդ որոշումը օրինական է, թե ոչ, պետք է որոշի դատարանը, ոչ թե այստեղ հավաքվածները: Պարոն համայնքապետը բազմիցս հայտարարել է, որ եթե ինձ հետ համաձայն չեք, գնացեք դատարան: Հիմա ինչու է խախտում իր իսկ լոզունգները, ինչի՞ է բնակչության տանում բախման»,-ասաց Արտակ Հարությունյանը:

Դիտարկմանը, որ գյուղացիները պնդում են, որ ավագանու արձանագրություն, որով դադարեցվել են գյուղապետ Նորայր Գրիգորյանի լիազորությունները, իրավաչափ չէ, քանի որ հավաքվել են ծիրանի ծառի տակ ու որոշում են կայացրել, Արտակ Հարությունյանն արձագանքեց. «Նիստի տեղն ու վայրը որոշում է ավագանին իր մեծամասնությամբ: մարզպետը պետք է մեկին այդ թափուր տեղում նշանակե՞ր, թե ոչ: Խնդիր ունե՞ք Գարիկ Սարգսյանի դեմ, առի՞թ էր պետք ձեզ, թե քաղաքական ֆոն ես տալիս, որ դառնաս հետապնդման ենթարկվող: Չի լինելու դա: Բոլորն էլ հասկանում են, թե դու ինչ շոու ես սարքել»:

Հիշեցնենք, որ այսօր նորաշենցիները հավաքվել են Արարատի մարզպետարանի շենքում եւ պահանջում էին չեղարկել Արտակ Հարությունյանին գյուղապետի պաշտոնակատար նշանակելու որոշումը եւ հետ բերել գյուղապետ Նորայր Գրիգորյանին: Մարզպետարանի շենքում լարվածություն առաջացավ, երբ այնտեղ եկան նաեւ մարզպետի եւ Արտակ Հարությունյանի կողմնակիցները: Ոստիկանները բնակիչներին իջեցրին շենքից:

Ավելի վաղ հայտնել էր, որ Նորաշենի ավագանու արձանագրության համաձայն դադարեցվել են գյուղապետ Նորայր Գրիգորյանի լիազորությունները: Վերջինիս կողմնակիցները դուրս են եկել բողոքի եւ հայտարարում են, որ այդ որոշումն անօրինական է, որ չկա ավագանու նիստի արձանագրություն, որն իրավազոր կլինի: Ակցիայի մասնակիցները գյուղապետի գլխավորությամբ պահանջում են իրենց ներկայացնել այդ արձանագրությունը, որի հիման վրա Տարածքային կառավարման եւ ենթակառուցվածքների նախարությունը դադարեցրել է գյուղապետի լիազորությունները:

Նորայր Գրիգորյանը հայտարարել է, որ մարզպետի հետ իր հարաբերությունները լարվել են, երբ ինքը ընտրությունների ժամանակ պաշտպանել է այլ թեկնածուի՝ Սերգեյ Ատոմյանին, ով նույնպես պատգամավոր է ընտրվել «Իմ քայլը» խմբակցությունից: