Ժակ Շիրակի աճյունով դագաղը հրաժեշտի համար կդրվի Փարիզի Սեն Լուի տաճարի մոտ

Ֆրանսիայի նախկին նախագահ Ժակ Շիրակի հարազատները որոշել են բոլոր ցանկացողներին հնարավորություն տրամադրել վերջին հրաժեշտը տալ հանգուցյալ քաղաքական գործչին, հաղորդում է ՏԱՍՍ-ը՝ հղում անելով BFM հեռուստաալիքին:

Հեռուստաալիքն այսօր հայտնել է, որ կիրակի տեղական ժամանակով ժամը 14:00-ին հանգուցյալի աճյունով դագաղը կդրվի Փարիզի Հաշմանդամների տան պատմական համալիրի տարածքում գտնվող Սեն Լուի (Սուրբ Լյուդովիկոս) տաճարի մոտ: Մոտակայքում ցավակցությունների համար գրքեր կդրվեն:

Հրաժեշտի արարողությանը ներկա կլինեն Ժակ Շիրակի հարազատները: Արարողության ավարտից հետո դագաղը կտեղափոխվի Սեն Սյուլպիս եկեղեցի, որտեղ կեսօրից սկսած հրաժեշտի մեծ ծիսակատարություն տեղի կունենա: Սեն Սյուլպիս եկեղեցին այժմ խոշոր արարողությունների անցկացման համար փոխարինում է Փարիզի Աստվածամոր տաճարին, որը տուժել էր ուժեղ հրդեհից:

Le Parisien-ի տեղեկություններով՝ այժմ Մոնպառնաս գերեզմանատանը աշխատանքներ են տարվում Ժակ Շիրակի հուղարկավորությունը կազմակերպելու համար: Գրանիտե գերեզմանաքարի վրա արդեն գրվել է քաղաքական գործչի անունն ու ծննդյան եւ մահվան տարեթվերը: Գերեզմանը գտնվում է Փարիզի ամենահայտնի գերեզմանատանը, «Հավերժ հանգիստ հանճարին» անվանումով հուշարձանի մոտ: Ժակ Շիրակը կդառնա Ֆրանսիայի 5-րդ Հանրապետության առաջին նախագահը, որը կհուղարկավորվի Փարիզի տարածքում:

Ժակ Շիրակի փեսան՝ Ֆրեդերիկ Սալա-Բարուն, սեպտեմբերի 26-ին հայտնել էր, որ նախկին նախագահը մահացել է առավոտյան իր հարազատների շրջապատում:

Ժակ Շիրակը հեռացել է քաղաքականությունից երկու ժամետով երկիրը ղեկավարելուց հետո՝ 1995-ից մինչեւ 2007 թվականը: Ֆրանսիական լրատվամիջոցները հիշեցնում են, որ 2005-ին քաղաքական գործչի մոտ սրտանոթային համակարգի հիվանդություն էր ախտորոշվել: 2016-ին նրա առողջական վիճակը կտրուկ վատթարացել էր ավագ դստեր մահից հետո: Վերջին 3 տարիներին նախկին նախագահը չի մասնակցել պաշտոնական արարողություններին, հազվադեպ է այցելուների ընդունել: