«Save Միլիոն» ներկայացման պրեմիերան և հայտնի հյուրերը (Տեսանյութ)

Ստանիսլավսկու անվան դրամատիկական թատրոնում սեպտեմբերի 25-ին մեծ պրեմիերա էր: Մկրտիչ Արզումանյանը, Լեւոն Հարությունյանը, Վիկտորիա Սահակյանը, Էվա Խաչատրյանն ու Սերգեյ Գրիգորյանը համախմբվել էին ռեժիսոր Նորա Գրիգորյանի #SaveՄիլիոն ներկայացման շուրջ: Ներկայացման մասին NEWS.am STYLE-ն արդեն պատմել է իր ընթերցողներին՝ զրուցելով Մկրտիչ Արզումանյանի հետ:

Մենք, բնականաբար, չէինք կարող բաց թողնել աստղային կազմով այս կատակերգության պրեմիերան եւս, որի սցենարի հեղինակը ոչ պակաս հայտնի Արմեն Վարդանյանն է:

Ներկայացումը բնույթով քաղաքական կատակերգություն է: Հանդիսատեսն այնտեղ կգտնի ծանոթ անուններ, հավաքական կերպարներ եւ հայտնի արտահայտություններ:

Պատմության գլխավոր հերոսը Մամիկոնն է (Մկրտիչ Արզումանյան), որը օլիգարխ-մարզպետ Աշոտ Շարմազանովիչի (Լեւոն Հարությունյան) իրավաբանն է. նա տեղյակ է վերջրինի բոլոր գորածարքներից, անձնական եւ գործնական գաղտնիքներից: Մամիկոնի կյանքում հետաքրքիր փոփոխություն է տեղի ունենում, երբ ծանոթանում է մի թեթեւաբարո ուսանողուհու (Վիկտորիա Սահակյան) հետ, որի նպատակներները սկզբում նենգ էին: Մյուս երկու հետաքրքիր հերոսները արցախցի սպասավորն ու օլիգարխի կինն են, որոնց մարմնավորում են Սերգեյ Գրիգորյանն ու Էվա Խաչատրյանը:

Մոտ երկու ժամ տեւողությամբ ներկայացումից հետո Մկրտիչ Արզումանյանը խոստովանեց՝ լարվածությունը մեծ էր, բայց անհամբերությամբ է սպասում հանդիսատեսի արձագանքին: