Տեղի է ունեցել «Էլեկտրոնային նախաքննություն» ծրագրի «էլեկտրոնային գրադարան» բաժնի շնորհանդեսը. ՔԿ

ՀՀ Քննչական կոմիտեի նախագահ Հայկ Գրիգորյանի եւ Հայաստանում ԱՄՆ արտակարգ եւ լիազոր դեսպան Լին Թրեյսիի գլխավորությամբ այսօր՝ սեպտեմբերի 24-ին, տեղի է ունեցել «Էլեկտրոնային նախաքննություն» ծրագրի «էլեկտրոնային գրադարան» բաժնի շնորհանդեսը: Այս մասին NEWS.am-ին հայտնում են ՀՀ քննչական կոմիտեի տեղեկատվության եւ հասարակայնության հետ կապերի բաժնից։

ՔԿ նախագահը, ողջունելով հյուրերն, նշել է, որ «Էլեկտրոնային նախաքննություն» ծրագրի շարունակական կատարելագործման շրջանակներում, քննիչների մասնագիտական հմտությունները զարգացնելու եւ մարդու իրավունքների ոլորտի միջազգային փաստաթղթերի կիրառությունն ապահովելու նպատակով, ԱՄՆ դեսպանատան աջակցությամբ «Էլեկտրոնային նախաքննություն» ծրագրի մեջ ներդրվեց նաեւ «Էլեկտրոնային գրադարան» բաժինը:

«Հատկանշական է, որ Կոմիտեի ձեւավորումից ի վեր Կոմիտեի եւ ԱՄՆ դեսպանատան միջեւ համագործակցությունը շարունակական բնույթ է կրել, այդ համագործակցության շրջանակներում է, որ հնարավորություն է ստեղծվել Կոմիտեում թվայնացնել քրեական գործերը, Կոմիտեի մարմիններում եւ ստորաբաժանումներում ներդնել ներքին ցանց, ձեւավորել վարույթը կարճված, դատարան ուղարկված քրեական գործերով էլեկտրոնային արխիվ, առցանց օգտվել այլ գերատեսչությունների տեղեկատվական բազաներից, ներդնել կապի օպերատորների հետ դատարանների որոշումների եւ վերծանումների փոխանցման էլեկտրոնային համակարգ, գործարկել «էլեկտրոնային նախաքննություն» ծրագիրը»»,- ընդգծեց Հայկ Գրիգորյանը:

Նա նշեց, որ «էլեկտրոնային նախաքննություն» ծրագիրը յուրաքանչյուր քննիչի համար հանդիսանում է յուրօրինակ թվային հարթակ, որտեղ տեղ են գտնում քննիչի վարույթում քննվող քրեական գործերը:

Նշենք, որ ծրագիրը թույլ է տալիս նաեւ քննիչի աշխատանքների նկատմամբ վերահսկողություն իրականացնող անմիջական վերադասին տեսնել քննիչի վարույթում քննվող քրեական գործով կազմված որոշումները եւ արձանագրությունները, վարել էլեկտրոնային վիճակագրություն, առցանց եղանակով ստանալ տվյալ պահին Կոմիտեում հարուցված քրեական գործերի, դրանց շարժի եւ վերջնական ավարտի, ինչպես նաեւ՝ քրեական գործերով ներգրավված մեղադրյալների մասին տեղեկատվություն:

Հայաստանում ԱՄՆ արտակարգ եւ լիազոր դեսպան Լին Թրեյսին իր հերթին նշեց, որ ուրախ է մասնակցել «էլեկտրոնային գրադարան» բաժնի շնորհանդեսին. «Ուրախ եմ Քննչական կոմիտեի նախագահ Հայկ Գրիգորյանի հետ միասին պաշտոնապես բացել այս էլեկտրոնային գրադարանը, որը Քննչական կոմիտեի էլեկտրոնային քննության համակարգի կարեւորագույն բաղադրիչներից է եւ ապահովվել է ԱՄՆ դեսպանության Թմրամիջոցների դեմ պայքարի եւ իրավապահ համագործակցության գրասենյակի կողմից։ Միացյալ Նահանգները գործակցում է Քննչական կոմիտեի հետ՝ աջակցելու Հայաստանի արդարադատության համակարգի արդիականացմանը եւ առավել թափանցիկ ու արդյունավետ գործունեությանը»։

ԱՄՆ դեսպանն ընդգծեց, որ ցանկանում են օգնել Հայաստանին՝ կառուցելու ամենալավ իրավապահ համակարգը. «Այս առումով է, որ թմրամիջոցների դեմ պայքարի եւ իրավապահ համագործակցության բյուրոն համագործակցում է Քննչական կոմիտեի հետ վերջին հինգ տարիների ընթացքում: Մենք հովանավորել ենք այն տեխնոլոգիական փոփոխությունները, որոնց շնորհիվ Քննչական կոմիտեի կողմից կատարված քննությունները կատարելագործվել են՝ ապահովելով սարքավորումներով, այդ թվում՝ սկաներներով, սերվերներով եւ համացանցային ծրագրերի ներդրումներով: Եվ, անշուշտ, մենք օժանդակել ենք էլեկտրոնային գրադարանի մշակման հարցում, որն արդեն ծառայում է որպես էլեկտրոնային նախաքննության համակարգի բաղադրիչ մաս: Բացի այս տեխնոլոգիական բարելավումներից, մենք նաեւ ողջունում ենք Քննչական կոմիտեի նախաձեռնությունը՝ Միացյալ Նահանգներում եւ արեւմտյան երկրներում մարդու իրավունքներին վերաբերող կարեւոր խնդիրներին լուծում տալու մոտեցումներին ծանոթանալու հարցում»,- ընդգծեց ԱՄՆ դեսպանը:

Նա շնորհակալություն հայտնեց Քննչական կոմիտեի նախագահ Հայկ Գրիգորյանին՝ ջերմ ընդունելության եւ համագործակցությունում նոր ուղենիշ սահմանելու համար: