Ժողովուրդն է ինձ տվել այդ մանդատը, ես հաշվետու եմ նախ և առաջ իմ ժողովրդի առջև․ Թագուհի Թովմասյանը՝ մանդատը վայր դնելու լուրերի մասին. Tert.am

ԱԺ «Իմ քայլը» խմբակցության պատգամավոր Թագուհի Թովմասյանը հերքում է մամուլում տարածված այն հրապարակումները, թե խմբակցությունում իրեն ասել են՝ պետք է մանդատը վայր դնի։ Նա նաև հերքում է, թե վարչապետ Նիկոլ Փաշինյանն իր մոտ է կանչել այդ խնդրով։

Tert.am-ի հետ զրույցում նա նշեց, որ, այո, հանդիպում վարչապետ Նիկոլ Փաշինյանի հետ եղել է։ «Այո, հանդիպել եմ ՀՀ վարչապետ Նիկոլ Փաշինյանի հետ և քննարկել ենք ամենատարբեր հարցեր, բայց պատգամավորական մանդատի մասին որևէ խոսակցություն չի եղել: Իսկ ինչ վերաբերում է խմբակցությանը, ապա ես միշտ իմ հարաբերությունները գործընկերների կամ ոչ գործընկերների հետ կառուցել եմ այնպես, որ ինձ հետ որևէ մեկը չի խոսել և չի էլ կարող խոսել «պիտի», «պետք է» ձեւակերպումներով: Հետևաբար չէր կարող նման պարտադրանք լինել խմբակցության կողմից իմ նկատմամբ հատկապես նոր Հայաստանում, որտեղ ժողովրդավարությունն ու բազմակարծությունը գերակա արժեքներ են»,- ասաց Թովմասյանը:

Հարցին՝ ինչ հարաբերություններ ունի վարչապետի, նաև խմբակցության անդամների հետ, արդյոք ինչ-որ խնդիրներ կան, նա նշեց, որ խմբակցության անդամների հետ ունի նորմալ հարաբերություններ և աշխատում են փոխադարձ հարգանքի մթնոլորտում։

«Բայց միաժամանակ ես մշտապես կոնկրետ հարցերի վերաբերյալ ունեցել եմ և ունեմ իմ դիրքորոշումը, որը փոփոխության ենթակա չէ: Եվ «Իմ քայլը» խմբակցությունը ձևավորման օրվանից բազմակարծությամբ աչքի է ընկել: Իսկ ինչ վերաբերում է ՀՀ վարչապետին, ապա ասեմ, որ տարիներ շարունակ ես և գործող վարչապետը՝ որպես ազատ մամուլի ղեկավարներ, պայքարել ենք անարդարությունների, խոսքի ազատության դեմ ոտնձգությունների, կոռուպցիայի և այլ դատապարտելի երևույթների դեմ, ու մեր հարաբերությունները բխում են նաև այդ միասնականության ու գաղափարախոսության տրամաբանությունից»,- ասաց պատգամավորը:

Իսկ թե խմբակցության գործընկերներն ինչպես են վերաբերվում այն փաստին, որ նա իրենց կարծիքից տարբերվող դիրքորոշումներ ունի որոշ հարցերի շուրջ, Թովմասյանը պատասխանեց․ «Ես ԱԺ պատգամավորի մանդատը ստանալու օրվանից որևէ հարցի շուրջ տեսակետ չեմ փոխել: Խոսքի ազատությունն ինձ համար անփոխարինելի արժեք է, ու ես համարվում եմ այդ արժեքի կրողը դեռ լրագրության տարիներից»:

Ճշտող հարցին՝ ինչպես են վերաբերվում խմբակցությունում այն փաստին, որ Թովմասյանը տարբերվող կարծիք ունի Ամուլսարի վերաբերյալ, մամուլում նշվում են նաև վերապահումներ Վահե Գրիգորյանի նկատմամբ, Թովմասյանն արձագանքեց․ «Ինչպես արդեն նշեցի, բազմակարծությունը կարևոր չափորոշիչներից է մեր խմբակցությունում: Այն թեմաները, որոնց մասին ես խոսել եմ նախորդ տարիներին, շարունակում եմ նույն կարծիքի մնալ նաև հիմա: Եթե ես մոտ 6 տարի առաջ՝ նախորդ իշխանության օրոք, ասել եմ, որ Ամուլսարի ու ընդհանրապես որևէ հանքի շահագործումը վտանգավոր է, չեմ կարող հիմա՝ կարգավիճակի փոփոխության բերումով, այլ կարծիք արտահայտել»:

Հարցին՝ ի վերջո հնարավո՞ր է, որ մանդատը վայր դնի, Թովմասյանն ասաց․ «Եթե կարճ պատասխանեմ, ապա ոչ»:

Պատգամավորը հավելեց, որ իր լրագրողական գործունեության ողջ ընթացքում ուղիղ կապի մեջ է եղել ՀՀ բոլոր մարզերի, մասնավորապես իր մարզի՝ Գեղարքունիքի բնակիչների հետ, որոնք միշտ գնահատել են իր աշխատանքը: Նա նշեց, որ այսօրվա մանդատը ստացել է նաև ժողովրդի տարիների ընթացքում կուտակած վստահության արդյունքում․ «Հետևաբար պետք է ընդգծեմ, որ ժողովուրդն է ինձ տվել այդ մանդատը: Եվ ես հաշվետու եմ նախ և առաջ իմ ժողովրդի առջև: Մարդիկ ինձ հավատացել են, ու ես իրավունք չունեմ այդ հավատը կոտրել»,-ընդգծեց նա: