ԱՄՆ փոխնախագահը սենատորներին հայտնել է Իրանի դեմ հնարավոր միջոցառումների մասին

ԱՄՆ փոխնախագահ Մայքլ Փենսը ամերիկացի հանրապետական սենատորների համար փակ ճեպազրույց է անցկացրել Սաուդյան Արաբիայի նավթային օբյեկտների վրա հարձակման շուրջ իրավիճակի եւ վաշինգտոնյան վարչակազմի հնարավոր պատասխան միջոցառումների մասին: Այս մասին լրագրողներին հայտնել են մի շարք օրենսդիրներ, որոնք մասնակցել են հանդիպմանը, փոխանցում է ՏԱՍՍ-ը:

Սենատոր Լինդսի Գրեմի խոսքով (Հարավային Կարոլինա նահանգից)՝ Փենսը նշել է ամերիկյան իշխանությունների նպատակը, որն է Թեհրանին «զսպելու նախկին մակարդակի վերականգնումը»: Հանրապետականի կարծիքով՝ այն կորսվել է այն բանից հետո, երբ Իրանը որպես թուլություն գնահատեց ԱՄՆ նախագահ Դոնալդ Թրամփի զուսպ արձագանքը հունիսին իրանական ԶՈՒ կողմից ամերիկյան ՌԾՈՒ RQ-4 հետախուզական անօդաչու թռչող սարքը խփելուն: Թրամփն այդ ժամանակ հայտարարել էր, որ ԱՄՆ-ն պատրաստվում էր Իրանի տարածքում 3 օբյեկտների վրա կետային հարվածներ հասցնել, բայց գործողությունը սկսելուց 10 րոպե առաջ հրամայել էր այն չանցկացնել:

«Կարծում եմ, որ զսպման նախկին մակարդակի վերականգնման համար անհրաժեշտ է ինչ-որ ուրիշ բան անել, այլ ոչ այն, ինչ արել ենք անցյալ անգամ»,- պնդել է Գրեմը: Նա կոչ է արել «տարածքային պատասխան տալ, որն Իրանին այնպիսի հարված կհասցնի, որ նա ապագայում չի կարողանա առաջ ընթանալ»: Սենատորը նաեւ հայտնել է, որ Փենսի հետ հանդիպումից հետո վստահ է սաուդյան թագավորության նավթային օբյեկտների վրա հարձակմանը Թեհրանի մասնակցության հարցում:

«ԱՄՆ-ի համար եկել է ժամանակը բարձրացնելու իրանական նավթամշակման գործարանների վրա հարձակման հարցը, եթե շարունակի սադրանքները կամ մեծացնի միջուկային նյութերի հարստացման մակարդակը,- նշել է Գրեմն իր թվիթերյան էջում: - Իրանը չի դադարեցնի իր ոչ պատշաճ վարքագիծը, մինչեւ հետեւանքները չլինեն ավելի իրական, օրինակ՝ հարձակումների ենթարկվեն նրանց նավթամշակող գործարանները, որոնք կկոտրեն իրանական ռեժիմի ողնաշարը»: