Այնքան էլ իրավաչափ չէ երկու ահաբեկչի, երկու մանկասպանի փոխանակել մոլորված մարդկանց հետ. Արծրուն Հովհաննիսյան

Այնքան էլ իրավաչափ չէ երկու ահաբեկչի, երկու մանկասպանի փոխանակել մոլորված մարդկանց հետ: Այս մասին այսօր՝ սեպտեմբերի 13-ին, լրագրողների հետ զրույցում նշեց պաշտպանության նախարարի մամուլի խոսնակ Արծրուն Հովհաննիսյանը՝ անդրադառնալով հարցին, թե արդյոք հնարավոր է Արցախի բանտում գտնվող երկու ադրբեջանցիներին փոխանակել ադրբեջանական գերության մեջ հայտնված մեր քաղաքացիների հետ:

«Սա խնդրի մի կողմն է, կա մյուս կողմը, իսկ ո՞վ է ասել, որ իրենք համաձայն են այդ երկուսի դիմաց բոլորին հետ տալ, մի հատ էլ թողեն, որ գնանք «Արաբո» ջոկատի տղաների շիրիմների տեղը որոնենք: Այս երկրորդ մասով հազար անգամ իրենց հետ քննարկում եղել է, հազար անգամ առաջարկել ենք, որ դուք էլ ունեք անհետ կորածներ, մենք էլ ձեզ կարող ենք թույլ տալ և այլն: Բայց մոռանում եք, որ մենք գործ ունենք Ադրբեջանի հետ, մոռանում եք, որ մենք իրենց հետ ուղիղ կապ չունենք, միջնորդավորված կապ է, որտեղ շատ անկանխատեսելի է, թե ինչ են մտածում, ինչպես են մտածում»,-ասաց Արծրուն Հովհաննիսյանը:

Պաշտպանության նախարարի մամուլի խոսնակը՝ անդրադառնալով դիտարկմանը, որ այս տարվա առաջին կիսամյակում բանակում գրանցվել է 31 զինծառայողի մահ, որից միայն 1-2-ն են հակառակորդների գործողություններից, ասաց, որ երբ հակառակորդն ակտիվ մարտական գործողություն չի իրականացնում, մենք միշտ այս իրավիճակն ենք ունենալու:

«Ի՞նչ է, մենք ուզում ենք ամեն տարի ավելի շատ մարդ զոհվի հակառակորդից, քան այլ բաների՞ց: Այդպես չի լինում: Մենք էլ ենք ուզում, որ ընդհանրապես մարդ չզոհվի, բայց ՊՆ-ն շատ մեծ կառույց է, որտեղ մարդիկ զենքի, տեխնիկայի հետ գործ ունեն: Մենք օր ու գիշեր աշխատում ենք, սպաներ ենք կրթում, պատժում, դաստիարակում, խրախուսում, որ իրենց պարտականությունները ճիշտ կատարեն և կորուստներ չլինեն: Ամեն մի կորստից հետո լուրջ պատիժներ ու հետևություններ են կատարվում: Ցավոք, իրավապաշտպան կառույցներից շատերը այլ շահեր են հետապնդում, այլ գնահատականներ են տալիս, որ հասարակության մոտ այլ տպավորություններ մնան: Հայտարարությունները, թե ոչինչ չի փոխվել, բոլորը հանցագործն են, արդարացի չի»,-հայտարարեց Արծրուն Հովհաննիսյանը:

Անդրադառնալով հրադադարի խախտումներին, նա ընդգծեց. «Վերջին շրջանում չունենք հրադադարի խախտումների այնպիսի աստիճան, որը կարելի է համարել մտահոգիչ կամ աճած: Օրական մի քանի տասնյակ դեպքերը, հատկապես, որ փոքր տրամաչափի զենքերից են կրակում, ցավոք, մեզ համար դարձել են առօրյա երեւույթ»: