Բոլթոնի հրաժարականից հետո ԱՄՆ նախագահի ազգային անվտանգության հարցերով խորհրդականի պաշտոնին 10 մարդ է հավակնում

ԱՄՆ նախագահի ազգային անվտանգության հարցերով խորհրդական Ջոն Բոլթոնի հրաժարականից հետո այս պաշտոնին առնվազն 10 մարդ է հավակնում, հայտնում է CNN հեռուստաընկերությունը՝ վկայակոչելով աղբյուրներին:

Դոնալդ Թրամփի աշխատակազմից հավակնորդների թվում հեռուստաընկերությունը նշում է առաջին հերթին Իրանի հարցերով ԱՄՆ հատուկ ներկայացուցիչ Բրայան Հուկին: CNN-ի աղբյուրների տեղեկություններով՝ նա ինքն է շահագրգռված այդ պաշտոնում ծառայությամբ եւ Սպիտակ տանը մեծ հեղինակություն ունի: Նրա մրցակից կարող է դառնալ ԱՄՆ ԶՈՒ պասհեստազորի գեներալ-մայոր Ռիկի Ուոդելը, որը նախկինում մեկ տարի աշխատել է ԱՄՆ նախագահի ազգային անվտանգության հարցերով խորհրդական Հերբերտ Մակմաստերի տեղակալ: CNN-ն հավակնորդների հիմնական եռյակի մեջ է մտցրել նաեւ Հյուսիսային Կորեայի հարցերով ԱՄՆ հատուկ ներկայացուցիչ Սթիվեն Բիգենին, որի թեկնածությունը Սպիտակ տունը նախկինում դիտարկվում էր Ռուսաստանում ԱՄՆ դեսպանի պաշտոնում:

Հեռուստաընկերության տեղեկություններով՝ այս պաշտոնին հավակնում են նաեւ Սպիտակ տան աշխատակազմի ղեկավարի պաշտոնակատարի ազգային անվտանգության հարցերով խորհրդական Միկա Մալվենի Ռոբ Բլերը, Գերմանիայում ԱՄՆ դեսպան Ռիչարդ Գրենելը, Նիդեռլանդներում ԱՄՆ դեսպան Պիտ Հուքսթրան, ԱՄՆ փոխնախագահ Մայքլ Փենսի ազգային անվտանգության հարցերով խորհրդական Կիտ Կելոգը, ԱՄՆ ԶՈՒ պահեստազորի գնդապետ Դուգլաս Մակգրեգորը, պահեստազորի գեներալ Ջեք Քինը, ինչպես նաեւ Բոլթոնին առընթեր ԱՄՆ Ազգային անվտանգության խորհրդի աշխատակազմի ղեկավար Ֆրեդ Ֆլիթցը:

Հիշեցնենք, ավելի վաղ Operativ լրատվականը հաղորդել էր, որ ԱՄՆ նախագահ Դոնալդ Թրամփը հայտարարել էր, թե ազգային անվտանգության հարցերով իր խորհրդական Ջոն Բոլթոնին խնդրել է հրաժարական ներկայացնել նրա հետ տարաձայնությունների պատճառով: Նա հայտնել էր, որ նախատեսում է հաջորդ շաբաթ հայտարարել, թե այդ պաշտոնում Բոլթոնին ով կփոխարինի: Բոլթոնն իր հերթին հայտարարել էր, որ ԱՄՆ առաջնորդին ինքն է առաջարկել իր հրաժարականը:

Նախնական տեղեկություններով՝ Բոլթոնիին կփոխարինի Չարլզ Կապերմանը: