Մենք գնալու ենք այնպիսի քայլերի, որոնք որևէ կերպ չեն վնասի մեր պետական շահին, բնակչությանը, բնապահպանությանը. Մակունց

Այս փուլում խնդիր է դրվում, որ բնապահպանության տեսչական մարմինն անմիջապես սկսի գործողություններ Ամուլսարում և վեր հանի խնդիրներ, եթե դրանք գոյություն ունեն: Այս մասին այսօր՝ սեպտեմբերի 9-ին, ԱԺ-ում լրագրողների հետ զրույցում նշեց «Իմ քայլը» խմբակցության ղեկավար Լիլիթ Մակունցը:

Նրա խոսքով, այս փուլում խոսքը ոչ թե հանքի շահագործման մասին է, այլ այն շինարարական աշխատանքների, որոնք անհրաժեշտ են առաջին փուլում. «Ընդգծվեց, որ եթե անգամ շինարարական աշխատանքների ժամանակ նկատվի որևէ խախտում, շեղում իրենց նշած չափանիշներից, ապա տեսչական մարմինը կիրականացնի բոլոր անհրաժեշտ գործողությունները: Եթե 90 օրվա ընթացքում չվերացվեն խնդիրները, կդադարեցվի որևէ կարգի գործողություն: Այս դիրքորոշման հետ «Իմ քայլը» խմբակցությունը համաձայն է: Վարչապետի հետ հանդիպման ժամանակ խմբակցությունում առարկություն, որ մենք չպետք է գնանք այդ ճանապարհով, չի հնչել»,- հայտարարեց նա:

Հարցին, թե եթե ջերմուկցիները չբացեն Ամուլսար տանող ճանապարհները, կա՞ ուժով այն բացելու հավանականություն, Մակունցը պատասխանեց. «Ես առաջարկում եմ այս պարագայում պայմանական նախադասություններից դուրս գանք, որովհետեւ պետք է սպասենք, տեսնենք իրավիճակն ինչպես է զարգանում: Մնացյալ գործողությունների մասով կխնդրեմ, որ հարցադրումները լինեն բացառապես այն մարմիններին, որոնք գործողություններն իրականացնելու են»:

Նրա ներկայացմամբ, վարչապետի կողմից նշված դիրքորոշումը չի հակասում ժողովրդի շահերին. «Այստեղ բոլորովին կարիք չկա բաժանելու ժողովրդին կողմի և դեմի: Մենք գնալու ենք այնպիսի քայլերի, որոնք որևէ կերպ չեն վնասի մեր պետական շահին, բնակչությանը, բնապահպանությանը: Իր խոսքում պարոն Փաշինյանը նշեց, որ այս պարագայում դեմ դուրս գալու կարիք չկա»:

«Իմ քայլը» խմբակցության ղեկավար Լիլիթ Մակունցը՝ անդրադառնալով «Սասնա ծռեր» կուսակցության ներկայացուցիչ Ժիրայր Սեֆիլյանի հայտարարությանը, թե եթե ֆորսմաժորներ չլինեն, ապա մեկ տարի անց կլինեն ԱԺ արտահերթ ընտրություններ, ասաց, որ դա տվյալ կուսակցության տեսակետն է:

Հարցին, թե կա՞ն նման նախադրյալներ, Մակունցը պատասխանեց. «Ես չեմ կարողանում հասկանալ, թե որն է տրամաբանական կապը որպես իրավական պետություն գործելու, միաժամանակ բնակչության խնդիրները հաշվի առնելու սկզբունքով առաջ շարժվելու և արտահերթ խորհրդարանական ընտրություններ անցկացնելու հարցը քննարկելու»:

Նա անդրադարձավ Սեֆիլյանի մեկ այլ հայտարարության, ըստ որի կան հատուկ ծառայություններ, որոնք իրենք են որոշում ԱԺ կազմը և կարող են հասնել նրան, որ ԱԺ-ն պահանջի Նիկոլ Փաշինյանի հրաժարականը. «Եթե խոսքը մեզ վրա ազդելու մասին է, ես չգիտեմ, թե ինչի մասին է խոսում Սեֆիլյանը, որովհետև նման բան չկա: Եթե խոսքն այլ տիրույթում է, ոչ «Իմ քայլը» խմբակցության մեջ ազդեցությունների մասին, ապա կարծում եմ, որ եթե այդտեղ կա հանցակազմ, այդ թվում ազգային անվտանգությանն սպառնացող, ապա պարոն Սեֆիլյանն այդ մասին պետք է տեղեկացնի պատկան մարմիններին»: