«Մանսուրյանի կերպարի ընկալումը որոշակի վերանայման կարիք ունի». Փաշինյանի խոսքը՝ հոբելյանական համերգին
Վարչապետ Նիկոլ Փաշինյանը դուստրերի հետ Ալ. Սպենդիարյանի անվան օպերայի և բալետի ազգային ակադեմիական թատրոնում ներկա է եղել կոմպոզիտոր, ՀՀ ժողովրդական արտիստ Տիգրան Մանսուրյանի կինոերաժշտությանը նվիրված համերգին:
Փաշինյանը նաեւ շնորհավորական խոսք է ասել, նշել, որ Մանսուրյանի կերպարի ընկալումը որոշակի վերանայման կարիք ունի, քանի որ նրա հաջողությունները ոչ թե բախտի նվեր են, այլ հաղթանակ ճակատագրի նկատմամբ․ «Մարդ, որ ծնվել է Լիբանանում, որպես գաղթական լավ կյանքի հույսով հայտնվել է Խորհրդային Հայաստանում եւ հայտնվել է մի ծայրահեղ ծանր սոցիալական իրավիճակում, եւ ահա այդ կետից կարողացել է բարձրանալ դեպի ստեղծագործական փառքի երկնակամար»։
Վարչապետը այդ պատմությունը հատկապես կարեւոր համարեց՝ որպես օրինակ մարդկանց համար․ «Այս պատմությունը ինձ համար կարեւոր է ոչ թե Տիգրան Մանսուրյանին բնորոշելու համար, այլ ցույց տալու մարդկանց, որ ահա կա սեփական հուսահատությունը, անօգնականությունը, փակուղու զգացումը հաղթահարելու ճանապարհը, եւ մարդը բավարար չափով ուժեղ է ինքը ուրիշների կողմից իրեն պարտադրված ճակատագիրը հաղթահարելու համար, ինքը իրեն հաղթահարելու համար, պարտության դատավճիռը հաղթահարելու համար։ Նրա կերպարը ուրիշներին պիտի օգնի եւ քաջալերի հաղթահարելու հուսահատությունը եւ վստահություն ստանալու սեփական ուժերի նկատմամբ»։
Փաշինյանը նշեց նաեւ, որ Մանսուրայնի երաժշտությունը տալիս է ուժ, լավատեսություն, միասնականության զգացողություն․ «Մաեստրո, ուզում եմ Ձեզ շնորհակալություն հայտնել մեզ պարգեւած, սերունդներին պարգեւած այդ միասնական զգացողության համար, եւ խոսնարհվում եմ Ձեր առաջ Մաեստրո՛, ուզում եմ Ձեզ շնորհակալություն հայտնել երկար տարիներ արդեն սերունդներին պարգևած այդ միասնության, միասնականության զգացողության առաջ և ես խոնարհվում եմ Ձեր առաջ, Ձեր կյանքի առաջ, Ձեր անցած ճանապարհի առաջ և Ձեր այսօրվա կերպարի առաջ, անառարկելի հեղինակություն, անառարկելի բարոյականություն և անառարկելի հարգանք, խոնարհվում եմ Ձեր առաջ»:
Նշենք, որ համերգն անցկացվել է «Մաեստրո Մանսուրյան-80» համերգաշարի շրջանակում, որը նվիրված է Տիգրան Մանսուրյանի 80-ամյակին: Սիմֆոնիկ նվագախմբի կատարմամբ հնչել են հայ դասական երաժշտության վարպետի կինոերաժշտությունը ներկայացնող ստեղծագործությունները:
Հիշեցնենք, Operativ լրատվականը ուղիղ հեռարձակմամբ հրապարակել էր Նիկոլ Փաշինյանի Facebook-յան էջից տեսանյութ: