на Русском
Ուժեղացված ծառայության ընթացքում պահպանվող հա... 
Քննարկվել են Հայաստանի տնտեսական զարգացման և ... 
Ամերիկայի Ձայն»-ի տնօրեն Ամանդա Բենեթը հանդիպել է Հայաստանի, Վրաստանի և Ուկրաինայի քաղաքացիական հասարակության առաջնորդների հետ
Ազատ մամուլը կարևորագույն արժեք է. կարևոր է, որ քաղաքացիները ստանան անաչառ և բազմակողմանի տեղեկատվություն և, որ պակաս կարևոր չէ, որ վստահեն նրան, ինչ կարդում, տեսնում և լսում են: «Ամերիկայի Ձայն»-ի տնօրեն Ամանդա Բենեթը ազատ մամուլի կարևորության մասին իր տեսակետները ներկայացրեց Հայաստանի, Վրաստանի և Ուկրաինայի քաղաքացիական հասարակության առաջնորդների հետ հանդիպմանը, որոնք Միացյալ Նահանգներում հաջորդ օրերի ընթացքում կծանոթանան ամերիկյան հաստատությունների աշխատանքին և կկիսեն իրենց սեփական փորձը:
Հայաստանցի առաջնորդների այցը կազմակերպված է «Բաց աշխարհ» ծրագրի շրջանակներում, որը ֆինանսավորվում է ԱՄՆ-ի կոնգրեսի եւ իրականացվում Հայաստանում Միացյալ Նահանգների դեսպանության կողմից, նշում է ԱՄՆ-ի դեսպանության մամուլի պատասխանատու Թագուհի Ջահուկյանը.
«Ծրագիրը հնարավորություններ է ստեղծում Հայաստանից մասնագետների համար հանդիպելու իրենց ամերիկյան գործընկերների հետ եւ տեղում ծանոթանալու ամերիկյան փորձին, և հետագայում ստեղծված կապերն օգտագործելով, իրենց աշխատանքն ավելի արդյունավետ դարձնելով»:
Վաշինգտոնում «Բաց աշխարհ» ծրագրի Հայաստանցի մասնակիցների հետ քննարկմանը ամերիկյան մասնավոր լրատվամիջոցների ու նաև «Ամերիկայի Ձայն»-ի աշխատանքի փորձը ներկայացրեց «Ամերիկայի Ձայն»-ի հայկական ծառայության խմբագիր Արամ Վանեցյանը: ԱՄՆ-ի մայրաքաղաքից ծրագրի մասնակիցները կուղևորվեն Դեթրոյթ, որտեղ կհանդիպեն իրենց գործընկերներին: Հայաստանի Հանրային հեռուստառադիոընկերության խորհրդի իրավական խորհրդատու Կարեն Հովհաննիսյանը ցանկանում է ուսումնասիրել ամերիկյան փորձը մի շարք խնդիրների ինստիտուցիոնալ լուծման հարցում.
«Ցանկալի է կիրառել ամերիկյան ժողովրդավարության փորձը Հայաստանում, հաշվի առնելով, որ Հանրային հեռուստառադիոընկերությունը հանդիսանում է հանրության դեմքը, հանրության խողափողը Հայաստանում լուրջ զարգացումների մասին խոսելիս»:
Հանրային ռադիոյի մանկապատանեկան խմբագրության տնօրենի օգնական Սյուզաննա Թուսինյանին հատկապես հետաքրքրում է նոր տեխնոլոգիաների պայմաններում ռադիոյի զարգացման հեռանկարները.
«21-րդ դարում ռադիոն գնում է դեպի վիզուալիզացում և մենք նույնպես կիրառում ենք այդ փորձը, սակայն, պատրաստ ենք նաև դրսի փորձը բերել Հայաստան»:
Ծրագրի մասնակիցների հետ մեկ ժամից ավելի փակ դռների հետևում զրուցած ԱՄՆ-ի փոխպետքարտուղարի Եվրոպայի և Եվրասիայի հարցերով տեղակալ Ջորջ Քենթը հիշեցնում է՝ ծրագիրը փորձի երկկողմ փոխանակում է նախատեսում, ուստի ամերիկյան կողմը նույնպես հնարավորություն կունենա սովորելու հայ մասնագետներից.
«Ծրագրին մասնակցում է Հայաստանի հանրային հեռարձակողների փայլուն խումբ և մենք զրուցեցինք ազատ և պատասխանատու լրատվամիջոցների դերի մասին, որն օգնում է քաղաքացիներին անկաղմնակալ տեղեկություններ ստանալ, որպեսզի քաղաքացիները տեղեկացված որոշումներ կայացնեն և երկիրը հաջողություն գրանցի»:
