Թրամփը հայտնել է ազգային հետախուզության ղեկավարի և նրա տեղակալի հրաժարականների մասին

Լուսանկարում՝ Դեն Քոութս

Օգոստոսի 15-ին ԱՄՆ ազգային հետախուզության ղեկավար Դեն Քոութսը և տեղակալ Սյու Գորդոնը կլքեն իրենց պաշտոնները, այս մասին այսօր հայտարարել է ԱՄՆ նախագահ Դոնալդ Թրամփը, փոխանցում է «ՌԻԱ Նովոստի»-ն:

«Սյուն հայտարարել է, որ կհեռանա օգոստոսի 15-ին, ինչը համընկնում է Դեն Քոութսի հրաժարականին: Ազգային անվտանգության տնօրենի նոր պաշտոնակատարի անունը շուտով կհայտարարվի»,- նշել է Թրամփն իր Twitter-յան էջում:

Թրամփը Գորդոնին անվանել է պրոֆեսիոնալ և հայտնել նրա հանդեպ իր հարգանքի մասին:

Թրամփն ավելի վաղ հայտարարել էր այդ պաշտոնին հանրապետական կոնգրեսական Ջոն Ռեթքլիֆին առաջադրելու մտադրության մասին, սակայն մի քանի օր հետո հայտնել էր, որ Ռեթքլիֆը որոշել է Կոնգրեսում մնալ:

Քոութսը Թրամփի դժգոհությունն է հարուցել, երբ անցյալ տարվա հուլիսին NBC-ի հաղորդավար Անդրեա Միթչելի հետ հարցազրույցում քննադատել է նրա հարաբերությունները ՌԴ նախագահ Վլադիմիր Պուտինի հետ: Անցյալ շաբաթ այս հարցազրույցը հայտնվել է «Էմմի» մրցանակի հավակնորդների թվում:

Դրանից բացի, Քոութսը, ինչպես նշել է Axios պարբերականը, հունվարին հայտարարել էր, որ Հյուսիսային Կորեան չի հրաժարվի իր միջուկային ծրագրից, ինչը հակասում է Թրամփի քաղաքական գծին: