Ջոնսոնը խոստացել է Իռլանդիայի ղեկավարին, որ Մեծ Բրիտանիայի հետ կոշտ սահման չի ստեղծվի

Մեծ Բրիտանիայի վարչապետ Բորիս Ջոնսոնը երեքշաբթի խոսել է իռլանդացի գործընկերոջ՝ Լեո Վարադկարի հետ եւ խոստացել, որ Brexit-ից հետո թույլ չի տա սահմանային եւ մաքսային ենթակառուցվածքի առաջացում բրիտանա-իռլանդական սահմանին, տեղեկացնում է ՏԱՍՍ-ը՝ հղում կատարելով բրիտանական կառավարության ղեկավարի գրասենյակին։

«Նա ասաց, որ բոլոր սցենարների դեպքում կառավարությունը հավատարիմ կմնա Բելֆաստի համաձայնագրով ստանձնած իր պարտավորություններին եւ երբեք թույլ չի տա ֆիզիկական ստուգումներ կամ ֆիզիկական ենթակառուցվածք սահմանին»,- ասված է ՏԱՍՍ-ի՝ գրասենյակից ստացած հայտարարությունում։

Դրանում նաեւ նշված է, որ Ջոնսոնը հասկանալ է տվել Վարադկարին, որ «Մեծ Բրիտանիան ԵՄ-ից դուրս կգա հոկտեմբերի 31-ին՝ անկախ ամեն ինչից», բայց, ըստ նրա, պաշտոնական Լոնդոնը կհետեւի «բարեկամության ոգուն» Brexit-ի վերաբերյալ ցանկացած բանակցություններում եւ իր գերակա խնդիրն է համարում միությունից իր դուրս գալն ապահովելը Բրյուսելի հետ Brexit-ի վերաբերյալ նոր գործարք կնքելիս։ «Բայց դա պետք է այնպիսի գործարք լինի, որում տեղ չի լինի «բեքստոպին» (Օլսթերի անդամության պահպանմանը մաքսային միությանը եւ ԵՄ միասնական շուկային),- ընդգծել է գրասենյակը։

«Իսկ Հյուսիսային Իռլանդիայում գործադիր իշխանության եւ Ասամբլեայի գործունեության վերականգնման գործընթացի առումով երկու ղեկավարները վճռականություն են հայտնել հասնելու այն բանին, որպեսզի դա տեղի ունենա որքան հնարավոր է շուտ»,- տեղեկացրել է Դաունինգ սթրիթ 10 գրասենյակը։ Ջոնսոնը «անվերապահ աջակցություն» է հայտնել շարունակվող բանակցություններին այս խնդրի լուծման վերաբերյալ եւ ասել է, որ ցանկություն կա սերտորեն համագործակցելու պաշտոնական Դուբլինի հետ, որպեսզի ապահովվի Բելֆաստում իշխանության ինստիտուտների գործունեության վերականգնման համար նախաձեռնվող քայլերի հաջող արդյունքը։ Բրիտանիայի վարչապետը Իռլանդիայի վարչապետին նաեւ ասել է, որ «անհամբերությամբ սպասում է Հյուսիսային Իռլանդիա այցելելուն եւ խոսելու այդ մասին հինգ հիմնական կուսակցությունների առաջնորդների հետ»։

Գրասենյակում նշել են, որ տեղի ունեցած խոսակցության ժամանակ Վարադկարը շնորհավորել է Ջոնսոնին Մեծ Բրիտանիայի վարչապետի պաշտոնում, եւ ասել, որ երկու կողմերը խոստացել են շարունակել սերտ համագործակցությունը։

Իռլանդիայի վարչապետի աշխատակազմում նաեւ խոսել են բանակցությունների արդյունքների մասին։ Ջոնսոնը Դուբլինին կոչ է արել հրաժարվել Brexit-ի վերաբերյալ համաձայնագրում բեքստոպի մեխանիզմներից, ասվում է պաշտոնական հաղորդագրությունում։