Հայաստանում ՌԴ նախկին դեսպան Իվան Վոլինկինը կարող է դառնալ Լավրովի տեղակալը

ՌԴ ԱԳՆ-ում փաստորեն կողմնորոշվել են, թե ով է լինելու փոխնախարար Դաշնության խորհրդում առաջադրվող Գրիգորի Կարասինի փոխարեն։ «Կոմերսանտի» մի քանի տեղեկացված զրուցակիցների խոսքով՝ այդ բարձր պաշտոնում նախատեսվում էր երեք թեկնածու։ Նրանցից հիմնականը նախարարության հյուպատոսական դեպարտամենտի ներկայիս տնօրեն Իվան Վոլինկինն է։ 60-ամյա դիվանագետն ավարտել է Մոսկվայի միջազգային հարաբերությունների պետական ինստիտուտը եւ այդ ժամանակվանից ի վեր աշխատում է ԱԳՆ համակարգում։ Աշխատել է ԽՍՀՄ եւ ՌԴ Հարավսլավիայի, ԱՄՆ, Սերբիայի եւ Չեռնոգորիայի, Վրաստանի եւ Մակեդոնիայի արտասահմանյան ներկայացուցչություններում։ 2009-2013 թվականներին եղել է ՌԴ ԱԳՆ ղեկավար Սերգեյ Լավրովի օգնականը, նախարարության գլխավոր քարտուղարության փոխտնօրենը։ 2013-2018 թվականներին Հայաստանում Ռուսաստանի Արտակարգ եւ լիազոր դեսպանն էր։ 2017-ին պարգեւատրվել է Պատվո շքանշանով։

Այն մասին, որ Սախալինի նահանգապետի պաշտոնակատար Վալերի Լիմարենկոն Դաշնության խորհրդում կառաջադրի փոխարտգործնախարարի՝ Գրիգորի Կարասինի թեկնածությունը, վերին պալատում աղբյուրին հղում կատարելով տեղեկացրել է ՌԲԿ թերթը։ Ավելի ուշ նա ինքը հաստատել է այս տեղեկությունը։ Գրիգորի Կարասինը օգոստոսին կդառնա 70 տարեկան։

Համաձայն «Պետական ծառայության մասին» օրենքի՝ այդ պաշտոնում կարելի է գտնվել մինչեւ 70 տարեկանը։

Գրիգորի Կարասինը 1971-ին ավարտել է Մ.Վ. Լոմոնոսովի անվան ՄՊՀ արեւելյան լեզուների ֆակուլտետը։ Դիվանագիտական աշխատանքի է 1972-ից։ Զբաղեցրել է տարբեր դիվանագիտական պաշտոններ ԱԳՆ կենտրոնական ապարատում եւ արտասահմանում (Սենեգալ, Ավստրալիա, Մեծ Բրիտանիա)։ Պարգեւատրվել է «Հայրենիքի առջեւ վաստակի» IV աստիճանի, Ալեքսանդր Նեւսկու, Բարեկամության, մի շարք այլ պետական եւ գերատեսչական շքանշաններով։ Ներկա պաշտոնին է 2005-ից։ ԱԳՆ-ում Գրիգորի Կարասինը ղեկավարում է ԱՊՀ պետությունների հետ երկկողմ հարաբերությունների հարցերը, արտասահմանում հայրենակիցների հետ աշխատանքը։ Պատասխանատու է Դաշնային ժողովի պալատների, Ռուս Ուղղափառ եկեղեցու եւ հասարակական կազմակերպությունների փոխգործակցության համար, ներառյալ նախարարության օրենսդիր գործունեությունը։

Ուղղությունը, որի համար ԱԳՆ-ում պատասխանատու է Գրիգորի Կարասինը, համարվում է ամենակարեւորներից մեկը Ռուսաստանի արտաքին քաղաքականության տեսակետից եւ, միաժամանակ, առավել խնդրահարույցներից մեկը։

Դրան են վերաբերում թե՛ հակամարտությունն Ուկրաինայի շուրջ, թե՛ Լեռնային Ղարաբաղի եւ Մերձդնեստրի դիմակայությունը, թե՛ մշտական առեւտրային պատերազմները Բելառուսի հետ։ ԱԳՆ աշխատանքի առանձնահատկությունն այս ուղղությամբ այն է, որ այդ երկրների վերաբերյալ որոշումներն ավելի հաճախ ընդունվում են ոչ թե նախարարությունում, այլ Կրեմլում։ Վերջին շաբաթներին սրվել են հակասությունները Վրաստանի հետ։ «Կոմերսանտի» հացազրույցում Գրիգորի Կարասինը հավաստիացրել է, որ Մոսկվան «կպայքարի Թբիլիսիի հետ ակտիվ հարաբերությունների» օգտին։ «Մեր երկու ժողովուրդները համբերություն եւ առողջ բանականություն ունեն՝ կառուցողական մոտեցումներ առաջադրելու համար»,- ասել է նա։